Tolo malo que podía ocurrir n'El Molinón sucedió. Derrota énte l'Espanyol dando una imaxe d'impotencia y cola certeza que'l vivir de les rentes acabóse. El descensu ta a namás un puntu y yá nun queda más marxen pa errores. O los asturianos entamen a sumar puntos o l'equipu acaba en segunda.

La Coordinadora Ecoloxista d'Asturies afita qu'énte "les continues declaraciones sobre les bondaes p'Asturies del Tren d'Alta Velocidá (AVE) Cantábricu, queremos reclamar qu'enantes de marafundiar recursos públicos que son limitaos habrá qu'estudiar si esta ye la meyor opción ambiental y económica pa meyorar el serviciu ferroviariu que yá tenemos y valorar adecuadamente si'l fuerte impactu ambiental ye asumible".

El diputáu d'IU-BA-LV na Xunta Xeneral del Principáu, Francisco Javier García Valledor, manifestó güei que nun va dimitir como diputáu de la coalición, anque señaló que va siguir cola mesma actitú "coherente" colos plantegamientos de la masa social del partíu y de los sos votantes.
 

Na reunión selmanal del Conseyu de Gobiernu aprobóse’l decretu qu’afita la nueva toponimia oficial del conceyu de Degaña. Les nueves denominaciones, aprobaes pola Xunta de Toponimia y yá col preste del Gobiernu asturianu, pasen a tener la consideración de denominaciones oficiales.

Los próximos díes 8 y 9 de mayu celébrense nel Auditoriu Palaciu de Congresos "Principe Felipe" d'Uviéu les primeres Xornaes sobre Mocedá y Llingües Minorizaes, entamaes pol Conseyu de la Mocedá del Principáu d'Asturies y Xunta Moza. Nelles van desendolcase una serie de debates y talleres nos que van participar espertos nun solo d'Asturies, sinón tamién de Galicia, Cataluña, País Vascu, Baleares o Gales.

ArcelorMittal ta acabante d'anunciar a los sindicatos la so propuesta d'Espediente de Regulación d'Empléu (ERE), qu'afectaría en principiu a los 12.000 trabayadores de les instalaciones que la multinacional tien nel Estáu español, incluyíes les plantes asturianes d'Avilés y Xixón. Ye intención de la empresa que'l plazu máximu de duración del espediente sía d'un añu y afectaría a un máximu del 40% de les hores llaborales.

L'Autoridá Portuaria de Xixón negó que la solicitú de financiación adicional pa les obres d'ampliación del Puertu d'El Musel (Xixón) se realizare a la escontra d'una circular del Ministeriu d'Economía sobre certificación de gastos, tal y como señaló ayeri'l PP nuna rueda prensa.

L'asociación cultural Alfabetización y Deprendimientu del Asturianu (AYDA) entama les sos primeres Xornaes d'Estudiu, que van celebrase los díes 25 y 26 d'abril en San Xuan de Beleño, nel conceyu de Ponga. Delles charres etnográfiques y una amuesa de bailles del país componen el programa d'estes xornaes.

Los investigadores del Observatoriu Européu Austral, ESO, tán acabantes d'anunciar nuna rueda de prensa cellabrada esta mañana el descubrimientu d'un planeta asemeyáu al nuestru. De fechu, sigún los datos, esti ye'l exoplaneta más pequeñu atopáu hasta la fecha.
 

Los 14 mozos antifacistes acusaos de cometer desordes públicos en Cangues d'Onís en setiembre del 2005, demientres  los incidentes previos a una concentración de la organización Democracia Nacional, van tener que pagar multes d'ente 150 y 240 euros. El pidimientu fiscal yera de penes d'ente ún y cuatro años y mediu de cárcel.