El PP va pidir a la Fiscalía qu'investigue la tramitación de la embotelladora d'agua de Somiedu

L'equipu xurídicu del PP d'Asturies prepara estos díes una serie d'espedientes pa presentar, previsiblemente la próxima selmana, na Fiscalía tola documentación relativa a la tramitación pa la instalación d'una planta embotelladora d'agua del parque de Somiedu. Según esplicó'l diputáu del PP na Xunta Xeneral del Principáu d'Asturies, Alfonso Román López, el procesu valió pa qu'una empresa privada "se beneficiare con dineru públicu", y añadió que "equí hai dalgún tipu de delitu".

   Román López, qu'ofreció güei una rueda prensa xunto a los tamién diputaos Marcial González y Emilio Pérez Cueva, esplicó que l'Ayuntamientu de Somiedu mercó, sovencionáu pol institutu de Desarrollu Económicu del Principáu d'Asturies, una finca por 61.292 euros.

   Dempués, la final recalificóse como terrenu industrial. "Dalgo que nun ta previsto", nel Plan de Xestión del Parque de Somiedu, señaló Román López. Más tarde s'urbanizó, tamién con sovención del Idepa, por 695.702 euros.

   Recientemente, la finca axudicóse mediante subasta, a la empresa Agües de Somiedu S.A., por 95.000 euros. "Pel camín quedaron 636.000 euros", llamentó Alfonso Román López. Amás, señaló que la Conseyería d'Infraestructures del Principáu invirtió 416.459 euros nuna ampliación d'un puente pa "beneficiar" la finca.

   El PP llamó l'atención amás sobre la "rapidez" del procesu per parte del Ayuntamientu y del Principáu y la "unanimidá" a la hora d'eliminar la prohibición absoluta d'actividá industrial na finca citada.

   A xuiciu del PP ye necesario conocer el "autor material y l'intelectual" d'esta maniobra que "valió pa beneficiar a una empresa privada col dineru de tolos asturianos".