Mieres celebra la so "Folixa" esti fin de selmana

La Folixa na Primavera, festival folk que se celebra en Mieres dende va 14 años, celebra esti fin de selmana una nueva edición. Otra vuelta, una mezcolancia de grupos asturianos y foriatos va ser la qu'igüe la propuesta musical de la Folixa, una de les cites más importantes dientro del calendariu folk n'Asturies.
 
La Folixa na Primavera va desarrollase'l 3, 4 y 5 d'aril, con un cientu d'actividaes a llargo d'esos díes, mercaos, teatros na cai, amueses de música tradicional y prebes de sidra son lo protagonistes del programa diurnu. Pela nueche l'atención céntrase nos conciertos de los grupos folk. Asina, el vienres día 3 la música va entamar cola actuación a les 22:00 hores de los asturianos Llan de Cubel, hestoria viva del folk asturianu, y que tán acabantes de participar nel Celtic Connection de Glasgow. La visita foriata del vienres va venir de la mano de los escoceses "Battlefield Band", otros veteranos de la música folk que lleven más de 30 años tocando per tol mundu y espublizando bien de discos.
 
El sábadu, el son del escenariu de la Folixa na Primavera tira hacia daqué diferente. Ello ye que'l grupu asturianu d'esa nueche van ser los rockeros asturianos Dixebra. Al llau d'ellos, van tar los irlandeses Altan, un nome perimportante na escena folk internacional que dende los años ochenta son ensin dubia un referente nesti tipu de música.
 
La edición de la Folixa na Primavera de 2009 supón la continuidá d'una fecha afitada y respetada dientro de les actividaes culturales n'Asturies. Preba d'ello ye l'apueste que fai'l Conceyu de Mieres  nesti festival, al que-y asigna un presupuestu qu'anda pelos 62.000 euros.