El Gobiernu autonómicu trabaya "intensamente" pa establecer nueves llinies aérees dende Asturies

El conseyeru de Mediu Ambiente, Ordenación del Territoriu y Infraestructures, Francisco González Buendía, dixo güei que'l Principáu trabaya "intensamente" pa establecer nueves llinies aérees dende Asturies. "Ye un tema complexu, porque les compañíes tán faciendo los sos propios númberos", apuntó.

   Según esplicó Buendía, en declaraciones a los periodistes en Lieres, el fechu de que dalgunes compañíes dexaren de trabayar cola comunidá autónoma, nun se produxo porque nun tuvieren aceptación, sinón porque nun les compensa pol "siguiente saltu que dan". Faló d'un gran númberu de pasaxeros nel Aeropuertu d'Asturies, superior al previstu, y que tien una consideranza d'aeropuertu metropolitanu.

   Sicasí, Buendía señaló que, en rellación al aeropuertu, siempre se-y entruga pol "xugador que nun xuega" y esplicó que nesi momentu Air France ta teniendo un "gran éxitu" con dos conexones diaries con París dende Asturies. "Naide los llamó y vieron les oportunidaes del Principáu", señaló, mencionando tamién el potencial de les llinies d'Air Berlín, al traviés de les sos conexones con Mallorca.

   Buendía tamién faló de la llegada del AVE a Asturies y de les declaraciones que la secretaria d'Estáu d'Infraestructures, Josefina Cruz Villalón, fizo'l pasáu miércoles, cuando faló de la compatibilidá de los tráficos de mercancíes y de pasaxeros nos túneles de Payares.

   El conseyeru señaló qu'una de les cuestiones más importantes p'Asturies ye'l desarrollu del tresporte de mercancíes. Esplicó que los tiempos van ser "mui competitivos", con esi tráficu mistu, con paraes n'Uviéu y Xixón, que ye a lo qu'aspiraba'l Principáu.

   Entrugáu sobre un posible relevu nel Gobiernu de José Luis Rodríguz Zapatero, nel qu'a la titular de Fomentu, Magdalena Álvarez puen sustituyila, Buendía evitó facer comentariu dalgún, dao que señaló que nun hai nada oficial y sólo existen rumores. El mesmu argumentó utilizó cuando se-y entrugó pola financiación de l'ampliación del puertu d'El Musel (Xixón), un proyeutu pal que l'Estáu solicitó 135 millones a la Unión Europea.