Noticies curties

L'ésitu de '12 claves de futuro' lleva a Equo a celebrar esti sábadu '+ Claves de futuru', con un espaciu pal asturianu y la cultura. Asturies.com va participar nél falando sobre periodismu.

El conceyal de Carreño por UNA-Bloque (Compromisu por Carreño) Roberto Holgado nun va presentase a les eleiciones municipales. Anuncia que va trabayar en Somos Carreño.

El senador Isidro Martínez Oblanca reprochó esti miércoles a la ministra Ana Pastor la situación del Plan de Víes de Xixón. Tamién criticó la esclusión d'Asturies del 'Plan Juncker'.

Izquierda Xunida (IX) va contar col sofitu d'Izquierda Asturiana (IAS) en Mieres. Faustino Zapico va en representación de la formación nacionalista na llista de la coalición al conceyu.

Podemos Asturies celebra'l sábadu un alcuentru ciudadanu en Xixón pa la ellaboración del programa eleutoral. Compromisu por Asturies llama a la so militancia a participar nél.

"Ye una vergoña qu'ún de cada cuatro neños pase fame", afirma Andecha Astur. Según un informe d'UNICEF, un 26,7 por cientu de los rapacinos asturianos ta en riesgu de probitú.

La Casona del Bravial de Blimea va ser sede de la charra 'El pallabreru de la minería asturiana y el so orixe'. Ésta va celebrase esti vienres cola entreguina Lucía Cortina como protagonista.

Esti miércoles, a les 22.30 hores, la primer canal de TVE va emitir el programa 'Don de lenguas' de 'Comando Actualidad'. La llingua asturiana ye ún de los idiomes que lu protagonicen.

Esti sábadu, coincidiendo col Día Internacional de la Llingua Materna, la XDLA va entamar una aición reivindicativa. Va ser a les 10.30 hores delantre de les instalaciones de la RTPA.

El grupu municipal d'IX n'Uviéu presentó una moción pa entainar los trámites de revisión de la toponimia. El presupuestu del 2015 dedica 50.000 euros pa la igua de los nomes de llugar.

El líder de Foro, Francisco Álvarez-Cascos, anunció'l miércoles la so renuncia a encabezar la candidatura del partíu a les nacionales. Pretende asina dar pasu a xente más mozo.

L'ex presidente del país dio esta anuncia a los miembros de la Comisión Direutiva de Foro, que trataron de convecelu pa que rectificara na so decisión. L'argumentu dau por Álvarez-Cascos ye la necesidá de renovación pa enfrentase a la situación política nueva que se da n'Asturies. El candidatu de Foro a la Xunta Xeneral va decidise al traviés de primaries nel Congresu del partíu previstu pal 14 de marzu.

El Tribunal Constitucional confirmó la obligatoriedá de tener que colgar la bandera d'España na Casa Conceyu de Mungia. Esta decisión lleva a la so alcaldesa, del PNV, a dimitir.

En solitariu o dientru d'un frente más ampliu, Andecha Astur asegura "una candidatura nacionaliega d'izquierdes" nes eleiciones del 24 de mayu. Critica les alternatives sucursalistes.

El sábadu, a les 22 hores, va inaugurase'l ciclu d'intercambios musicales ente Asturies y Euskal Herria 'Glayíos/Oihuak'. Skama la Rede y Skakeitan son los primeros protagonistes.

La uviedina sala Whippoorwill acueye esti eventu con entraes a 5 euros –12 col discu 'Avante' o 'Orekariak'– hasta güei, y de 8, na puerta. Los llugares de venta son L'Esperteyu y María, n'Uviéu; sidrería Canteli y Centru Social La Llume, en Xixón; El Cafetón, n'Avilés; El Judá, en Siero; Ochobre, en L'Entregu; Matteria, en La Felguera; Café Habana, en Mieres del Camín; y Corquiéu, en Ribeseya.