Mala Reputación asoleya'l martes el so sétimu discu

'Eternas promesas' ye'l nome del sétimu trabayu de Mala Reputación, qu'ufre'l sábadu un conciertu de presentación en Cangues d'Onís. El discu inclúi un cantar n'asturianu, 'Fálame'.

Cuatro años depués, los munchos siguidores que la banda tien en tol Estáu van poder disfrutar de diez temes nuevos que conformen un álbum que la discográfica Rock Estatal Records cataloga como'l "más ambiciosu y cuidáu de la so trayeutoria". 'Eternas promesas' va salir a la venta'l martes, pero les persones que s'averen mañana a La Escuela Rock Bar a presenciar cualquier de los dos conciertos acústicos previstos pa les 20 y les 23.30 hores van poder mercar una copia del discu. En marzu, Mala Reputación va entamar una xira con aniciu n'A Coruña'l día 13 que yá tien confirmada una fecha n'Asturies: el 25 d'abril nel Vidiago Rock.

Otra manera, yá ye posible sentir l'adelantu del discu. Trátase del cantar 'Que la tierra...'.