El PAS nun va presentase a les Nacionales de mayu

El Partíu Asturianista (PAS) va tar ausente nunes eleiciones nacionales per segunda vez consecutiva. La formación anunció que namái tien previsto presentase en dalgunos conceyos.

El so secretariu xeneral, Xesús Cañedo, apunta a delles razones que califica de "evidentes". En primer lugar fai referencia a les "permales" condiciones actuales "pal asturianismu", pa depués señalar que "la inversión económica mínima pa llegar con perfil propiu al electoráu non baxaría nestes circunstancies de varios cientos de miles d’euros, cantidá del tou inalgamable pal Partíu Asturianista". Tamién ta'l fechu de que "la marea l’atención ta centrada nestos momentos n'otres fuerces polítiques; n’Asturies, como siempre, fuerces polítiques centraliegues, que poco tienen que ver col asturianismu".

"Nestes condiciones, preferimos nun decepcionar a los nuestros simpatizantes con un mal resultáu, lo que, per otru llau, vien preservar el patrimoniu la nuestra imaxen", continúa Cañedo, qu'añade que l'actividá del partíu sigue alantre a la espera "d'una meyor coyuntura nel futuru". Un exemplu ye la decisión de presentase pa les municipales en dellos conceyos "onde les condiciones son más favorables".

El PAS tampoco nun participó nes nacionales últimes, celebraes el 25 de marzu del 2012 tres l'adelantu eleutoral decidíu pol Gobiernu de Foro. Nes anteriores, nel 2011, presentóse na coalición Unión Asturianista xunto cola URAS, con Xuan Xosé Sánchez Vicente de candidatu, algamando 2.953 votos (0,49 por cientu del total).