Noticies curties

Alexis Tsipras yá exerce de primer ministru de Grecia tres algamar l'apoyu de la formación derechista Anexártiti Éllines. El Gobiernu de SYRIZA va contar con diez ministerios.

Gaspar Llamazares y Emilia Vázquez aconceyaron esti xueves cola direición de l'ALLA. El diputáu nel Congresu aseguró que la oficialidá va ser "fundamental" pa IX nun posible pautu de gobiernu.

Somos Asturies amosó la so discrepancia a la formación d'un Conseyu Coordinador en Podemos Xixón. Esta corriente refugó entrar nesti muérganu pese a la invitación de Xixón Sí Puede.

La organización Darréu vien d'incorporase a ¡Asturies en Pie!. Esta plataforma de coleutivos sindicales y sociales concentróse esti llunes n'Uviéu n'apoyu de los mineros de Zarréu imputaos.

Producciones Nun Tris va representar esti xueves nel xixonés Teatru Xovellanos la zarzuela n'asturianu 'La promesa'. Trátase d'una revisión de la obra d'Eduardo Martínez Torner.

Ésta pasa pel treslláu de l'aición de la creación orixinal a los años de la posguerra, nun ambiente marineru y industrial. El testu tamién se somete a una adaptación contemporanea, n'asturianu normativu, pero con un estilu cenciellu. La música va ser interpretada por un pianista, nuna puesta n'escena de calter minimalista.

Asturies rexistró 1.422 paraos menos nel mes d'avientu, lo que supón una baxada del 1,45 por cientu con respeuto al mes anterior. El númberu total de desemplegaos asítiase en 96.634.

Los pueblos del Valledor (Ayande) y Tormaleo (Ibias) celebren esti sábadu les sos mazcaraes d'iviernu. Dambes lleven el nome d'Os Reises y van madrugar pa pidir l'aguilandu.

A les 9 hores va salir la comparsa n'Ibias, en concreto en Villarmeirín, pa percorrer Taladrid, Villauril y Llanelo. A les 12.30 hores, n'Os Villares, los neños y neñes de la parroquia van amazcarizase con traxes fechos por ellos y, yá de tarde, la mazcarada va continuar per Os Villares, Buso, Luiña y Fresno, y, más tarde, per Funduvila y Tormaleo.

Mariano Rajoy, presidente del Estáu español, acudió a Asturies pa la inauguración del tramu caberu de l'Autovía del Cantábricu. La vía ye una realidá tres llustros de retrasu.

Esti añu cúmplense 30 de la muerte d'Andrés Solar nun accidente de tráficu. Andecha Astur quier recordar al escritor xixonés con un homenaxe'l domingu nel cementeriu de Deva.

La cita ta convocada a les 12.30 hores frente a la placa instalada nel llugar pola formación na alcordanza de Solar, militante del nacionalismu asturianu y ún de los meyores escritores en llingua asturiana pese a que la desgracia se crució nel so camín cuando tenía namái 29 años.

'Reciella. Families pol Asturianu' y la CONCAPA van recibir esti sábadu el Pegollu y el Madreñazu, de manera respeutiva, de los XXX Premios Andrés Solar. Va ser a les 19.30 en Xixón.

54 años depués, Cuba y Estaos Xuníos retomen rellaciones polítiques y económiques. Sicasí, caltiénse'l bloquéu, que necesita l'aprobación del Congresu pal so desaniciu.

Esti avance nel conflictu ente dos países separtaos por 144 quilómetros de mar anunciáronlu ayeri al empar Raúl Castro y Barack Obama. L'alcuerdu vieno tres meses de negociaciones que tuvieron la mediación del papa Xicu y de Canadá, y que finen na lliberación del estauxunidense Alan Gross, per un llau, y de Gerardo Hernández, Ramón Labaniño y Antonio Guerrero, de los nomaos '5 de Miami', pel otru.

La especialista n'investigaciones patrimoniales y rituales festivos del oriente, Yolanda Cerra, va falar de les fiestes y bandos de Llanes. Va ser esti martes na charra mensual d'Ástura.

La Banda Gaitas El Trasno va defender el cantar en gallego-asturiano 'Volviche' esti vienres nel X Liet Internacional. El certame celébrase na población baxa-saxona d'Oldenburg.

'Cielu llarbeáu, suelu moyáu' ye'l refrán nuevu qu'incorporamos na nuesa seición de 'Espaciu y Tiempu'. El nuesu llector Xosé Carllos Fernández Vicente sintiólu en Castañéu (Miranda).

Dende estes llinies animamos a los nuesos usuarios a que nos unvíen les sos refranes y frase feches al corréu electrónicu redaccion@asturies.com pa la llista que tamos ellaborando dientro de la estaya 'Deprendi asturianu' de 'Espaciu y Tiempu de la Llingua Asturiana'.