L'Audiencia investiga les obres d'ampliación d'El Musel

|

Javier Gómez Bermúdez investiga les irregularidaes cometíes nes obres d'ampliación d'El Musel. El xuez de l'Audiencia almitió a trámite una denuncia de la Fiscalía Anticorrupción.

Estes irregularidaes destapáronse tres les denuncies presentaes por Andecha Astur y Los Verdes d’Asturies n'Europa tres deteutar irregularidaes na axudicación de los trabayos a la Xunión Temporal d’Empreses (XTE) Dique Torres. La de la formación nacionalista llevó a l'apertura d'una investigación de la Oficina Europea de Lucha contra’l Fraude (OLAF) de la Comisión Europea que finó nun informe nel que se reclamen los 198 millones d’euros de les ayudes europees concedíes y yá recibíes, y se refuga la entrega d’otros 49.500.000 euros reteníos por mor de l’apertura d’esta investigación.

Agora, tres conocer l'informe de la OLAF, Anticorrupción cree que pue haber infracciones penales por parte de l'Autoridá Portuaria de Xixón y Dique Torres, dalgo que va investigar Gómez Bermúdez tres almitir a trámite la denuncia de la Fiscalía. L'Observatoriu Anticorrupción d'Asturies, entidá formada de manera mayoritaria por militantes de Podemos, presentara otra nel mesmu sen n'avientu.

Contador Estadistiques