Cortina va falar en Blimea del pallabreru mineru y el so orixe

La Casona del Bravial de Blimea va ser sede de la charra 'El pallabreru de la minería asturiana y el so orixe'. Ésta va celebrase esti vienres cola entreguina Lucía Cortina como protagonista.

La Doctora en Filoloxía Hispánica pola Universidá d'Uviéu y Especialista Universitaria en Filoloxía Asturiana "va averar a la xente al significáu y l’orixe de dalgunos de los términos emplegaos con más frecuencia n’actividá minera asturiana, esplicando en qué midida los términos que son patrimoniales s’esportaron a otres zones mineres de fuera", apunten dende la Oficina de Normalización Llingüística de Samartín del Rei Aurelio, entidá qu'entama esti actu con motivu del Día Internacional de la Llingua Materna (21 de febreru). Cortina va basase nel so artículu 'El léxicu mineru. Dalgunes cuestiones etimolóxiques', espublizáu nel númberu 108 de la revista 'Lletres Asturianes' de l'Academia de la Llingua Asturiana y presentáu nes Xornaes Internacionales d’Estudiu del añu 2012.

La conceyal de Cultura de Samartín, Gema Suárez Torre, y el del serviciu de normalización, Hugo Cortina, van acompañar a la especialista nesti actu con comienzu previstu pa les 19.30 hores.