Andecha Astur garantiza "una candidatura nacionaliega d'izquierdes" en mayu

En solitariu o dientru d'un frente más ampliu, Andecha Astur asegura "una candidatura nacionaliega d'izquierdes" nes eleiciones del 24 de mayu. Critica les alternatives sucursalistes.

"Dende Andecha Astur queremos señalar la nuesa disposición pa garantizar la presencia d'una alternativa nacionaliega d'izquierda nestes próximes eleiciones asturianes que sedrá lo más amplia posible, bien como Andecha Astur propiamente o como más afayadizo pueda resultar pa encadarmar una alternativa xunitaria", espresó Paulo Arboleya tres l'Aconceyamientu Xeneral celebráu'l sábadu en Xixón. "Consideramos que lo que nun podemos permitir ye qu'alternatives surdíes dende Madrid, con un sofitu mediáticu descomanáu, instalen les sos sucursales n'Asturies como si fuéremos un barriu de Madrid. Ye mester que tomemos nós mesmos les decisiones que mos lleven a un futuru meyor ensin los porgüeyos de persones ayenes al pueblu trabayador asturianu", añadió.

A nivel llocal, la organización va sofitar "aquelles candidatures populares non sucursalistes que se dean, poniendo comu exemplu a siguir el de Conceyu Abiertu por Noreña". Nel casu de que nun salgan alantre iniciatives d'esti tipu, "valoraremos la presentación de candidatures propies". Por último, Arboleya llamó "a nun dexase llevar por campañes mediátiques y a facer un esfuerzu por avanzar nuna xunidá d'aición del conxuntu del nacionalismu asturianu d'izquierda".