IU-BA presenta una moción a favor de la señalización billingüe en Samartin del Rei Aurelio

El grupu municipal d'Izquierda Unida-Bloque por Asturies del conceyu de Samartín del Rei Aurelio ta acabante de presentar una moción pa que'l Plenu apruebe "el cambiu de les señalizaciones y rótulos informativos de los servicios y equipamientos municipales, camudando los esistentes anguaño por otros que recueyan la información tanto en castellanu como n’asturianu".

Según la coalición "dende la creación de la Oficina de Normalización Llingüística del Ayuntamientu de Samartin del Rei Aurelio vienen desendolcándose nel nuestru municipiu una serie de campañes de sensibilización de la sociedá rellacionaes col usu del asturianu. Pente medies d’elles sectores como la hostelería, les escueles, centros de salú, padres de neños pequeños…, pudieron disponer de carteles y distintos materiales escritos n’asturianu".
 
Sicasi nel escritu presentáu añaden que "reconociendo esi trabayu, xeneralmente desarrolláu en rede, xunto col restu d’Oficines creaes nos diferentes ayuntamientos asturianos, el nuestru Grupu Municipal considera que nun se pue caltener por más tiempu un fechu, que d’acordies al  nuestru criteriu cuestiona’l trabayu de sensibilización que se vien faciendo. Tamos refiriéndonos a la ausencia de cualquier signu de presencia del asturianu, tanto na casa consistorial, como nel restu d’equipamientos y servicios municipales".

IU-BA cree que "nun se puede caltener por más tiempu esta situación, bramente contradictoria pola cual el mesmu ayuntamientu que convida  a la sociedá a emplegar l’asturianu caltién una actitú piesllada a la presencia  del asturianu na rotulación de los distintos servicios y equipamientos" polo que pide que'l Plenu del Conceyu de Samartin del Rei Aurelio apruebe'l "cambiu de les señalizaciones y rótulos informativos de los servicios y equipamientos municipales, camudando los esistentes anguaño por otros que recueyan la información tanto en castellanu como n’asturianu".