Sestos Alcuentros de la Mocedá cola Llingua, "Saca la Llingua"

Los Sestos Alcuentros de la Mocedá cola Llingua, "Saca la Llingua" van facese esti martes 28 d'abril nel Muséu del Pueblu d'Asturies, ente les 10:00 y les 14.00 hores. Cerca de 550 mozos y moces de los Institutos de Xixón "van participar nuna xornada lúdico-pedagóxica na que s'intenta averar la llingua asturiana a la mocedá de manera prestosa" según la Oficina Municipal de la Llingua, qu'organiza, "con gran éxitu, esta actividá dende hai seis años".

Tolos años al rodiu del mes de mayu (nel que se celebra la Selmana de les Lletres Asturianes) fáise esta actividá empobinada a los alumnos y les alumnes d'Enseñanza Secundaria Obligatoria y Bachilleratu. La mayor parte de la mocedá qu'estudia asturianu nos institutos de Gijón/Xixón, xuntáronse otros años nel teatru Xovellanos, nel Xardín Botánicu Atlánticu o nel Muséu del Pueblu d'Asturies. Les actividaes que van desendolcase son Xuegos Tradicionales, "Yinkana astronómica", l'actuación del monologuista Carlos García Alba,conocíu como Cellero, y un Karaoke.