L'Academia de la Llingua Asturiana dio anuncia de la edición 2009 de los sos cursos de branu. Los cursos van ser en Santantolín (Ibias) en réxime d'internáu del 3 al 14 d'agostu de 2009. Esta edición compónenla los Cursos Elemental y Avanzáu de Llingua Asturiana, dambos en collaboración cola Universidá d'Uviéu, asina como los d'Afondamientu Cultural y Llingüísticu y el Curso de Gallego-Asturiano (Primeira Fase).

Esti próximu miércoles 22 d'abril a les 19:00 preséntase'l llibru "Llingua clase y sociedá" nel salón de recepciones de la Casa Conceyu de Xixón. Nesti llibru recuéyense les ponencies y comunicaciones feches nun seminariu del mesmu nome entamáu poles Facultaes de Filoloxía y d'Historia de la Universidá d'uviéu nel añu 2006 y coordinaes por Rubén Vega, Xulio Viejo y Rafael Rodríguez Valdés.

Esti vienres 24 d'abril a les 19:00 hores nel Atenéu de Turón, el Serviciu de Normalización Llingüística de Mieres entama un "Alcuentru de Poesía" dientro del ciclu  "Alcuentros con Autores", qu'organiza cites mensuales ente autores y llectores de lliteratura asturiana. L'actu consistirá nuna mezcla de recital y alderique y nél participarán los poetes Pablo Texón, Pablo X. Suárez y José Luis Rendueles.

La cifra de negocios nel sector servicios baxó un 16,9% en febreru n'Asturies en comparanza col mesmu mes del añu anterior. Esti descensu ye inferior al esperimentáu nel conxuntu del Estáu, onde la cayida foi del 20,5%, la mayor en seis años. Según los datos espardíos güei pol Institutu Nacional d'Estadística (INE)  l'actividá nel sector tuvo un comportamientu negativu en toles comunidaes autónomes, siendo Asturies, xunto con Cantabria, la tercera con una menor cayida, per detrás de Galicia (-14,2%) y Aragón (-16,3%).

Asturies conviértese un añu más por estes feches en puntu de referencia del diseñu gráficu y industrial. Del 20 al 24 d'Abril Motiva avera al traviés de delles conferencies en Llaboral Centru d'Arte de Xixón, tolos factores qu'igüen el desendolcu d'un proyectu, dende la gráfica hasta'l Marketing BTL (Below the line).

Esti llunes 20 y martes 21 van celebrase n'Avilés y Xixón dos charles alrodiu’l tema la crisis económica. Éstes, organizaes pol "Comité de Apoyo de Izquierda Anticapitalista en Asturies", van centrase nun "plantegamientu de qué rempuestes polítiques y sindicales vamos poder dar a la crisis sistémica actual dende una perspectiva anticapitalista".

El llibru "Arqueología medieval en Asturias" d'Iván Muñiz López y Alejandro García Álvarez algamó'l Premiu "Alfredo Quirós", un galardón anual convocáu pola llibrería Cervantes d'Uviéu. Los trabayos "La cultura del tejo. Esplendor y decadencia de un patrimonio vital" d'Ignacio Abella y "La arqueología industrial de Oviedo y su área de influencia" de José Fernando González y Pelayo Muñoz Duarte resultaron finalistes.

L’Sporting salió derrotáu otra vuelta, nesta ocasión contra’l Betis, nun partíu floxu de dambos equipos. Esta nueva derrota asitia a los asturianos nuna situación que fai peligrar seriamente la so permanencia na máxima categoría del fútbol. La visita del Espanyol esti xueves que vien va ser clave nes opciones sportinguistes pa la permanencia.

Esti próximu xueves 23 d'abril va presentase na Xunta Xeneral del Principáu'l "Proyecto de Constitución Federal del Estado Asturiano", reedición d'una Constitución que los federales asturianos redactaron en 1883, obra desaparecida por más d'un sieglu y de la que se creía nun quedaba nengún exemplar. Sicasí recientemente l'historiador xixonés Sergio Sánchez Collantes atopó un exemplar, que ye'l qu'agora se reedita con un estudiu introductoriu del propiu investigador.