La enseñanza n'Asturies vive una nueva xornada de fuelga

Alredor de 11.000 docentes de les enseñances non universitaries tan convocaos polos sindicatos SUATEA, CC.OO, CSIF y ANPE esti martes 28 d'abril a una nueva xornada de fuelga pola negativa de la Conseyería a reunir la mesa sectorial d'educación y a retirar el plan d'evaluación de docentes. Esti ye'l segundu paru convocáu tres la fuelga del pasáu 2 d'abril.

Los sindicatos SUATEA, CCOO, ANPE y CSIF denuncien "el comportamientu irresponsable del Gobiernu asturianu" y "la inexistencia de negociación" polo que soliciten al profesoráu que sofite la "fuelga y la manifestación d'este martes día 28"  col oxetivu de "superar el malestar docente, recuperar la consideración debida per parte del Gobiernu y algamar la convocatoria de la Mesa Sectorial d'Educación y la Retirada del Plan de Evaluación". La presidenta de la Xunta de Personal, Beatriz Quirós afitó que'l "Gobiernu ta portándose como un trileru. POr mor que pa que se convocare la mesa sectorial tenía qu'haber unanimidá sindical, cualesquier cosa que se faiga ta viciada porque la UXT yá anunciare que diba votar en contra. Pretenden reíse del profesoráu".

Finalmente los sindicatos convocantes fixeron un llamáu a la participación na manifestación convocada güei n'Uviéu a les 18.00 hores con salida na Estación de Renfe y llegada a la Conseyería de Educación.

Unidá Nacionalista Asturiana sofita la movilización

La estaya d'educación de la UNA amosó'l so sofitu a esta convocatoria. Pa la UNA “fáise más necesaria que nunca, yá que los problemes que causaron la primera, -el llamáu “plan d'evaluación del profesoráu” y la negativa de la Conseyería d'Educación a convocar la Mesa Sectorial d'Educación p'asina arrequexar a los sindicatos más representativos- siguen igual de vixentes, y agravaos pola desfachatez de la mayoría parlamentaria del PSOE-IU avalando'l comportamientu antidemocráticu, faltosu y demagóxicu de la Portavoz del gobiernu Ana Rosa Migoya y la so ca vuelta más evidente marioneta, el Conseyeru d'Eduación Iglesias Riopedre”.