La Tertulia Cultural El Garrapiellu convoca los XVIII Premios de Cuentos Curtios

La Tertulia Cultural El Garrapiellu convoca un añu más los Premios de Cuentos Curtios, que fai la so XVIII edición. Dende El Garrapiellu afiten qu'estos premios, yá clásicos nel panorama lliterariu del país, quieren ser "el cumal d’un añu enllenu d’actividaes".
 
Ente estes rescamplen "charres como les de la cultura castreña con gran asistencia de públicu y la excursión a dellos castros del occidente asturianu, la marcha a Cuadonga que facia los quince años d’esta conocía ruta andariega, el I Certamen de Redaiciones pa Escolinos, amás de los xuegos y deportes tradicionales asturianos que tuvieron presentes en bien de fiestes de Xixón."

Según conseñen les bases el llargor de los trabayos, unu por persona, nun será enxamás superior a les 12 fueyes mecanografíaes a doble espaciu, escrites per una sola cara. El plazu d’entrega de trabayos pa esti premiu de Cuentos Curtios fina’l 22 d’ochobre y los rellatos han d’unviase a TERTULIA CULTURAL EL GARRAPIELLU, apartáu de correos 8133 – 33280 Xixón. El primer premiu ta dotáu con 900 €, el segundu va llevar 300 €. Les bases completes pueden consultase na web de la Tertulia Cultural El Garrapiellu.