El xuez impón a Cándido y Morala'l pagu d'una multa, amás de la indemnización al Ayuntamientu

El maxistráu del Penal númberu 1 de Xixón, Lino Rubio Mayo, comunicó a los representantes de la Corriente Sindical d'Izquierdes (CSI), Juan Manuel Martínez Morala y Cándido González Carnero, que tienen un plazu de trés díes hábiles pa esplicar cómo van pagar la indemnización de 5.624,83 euros al Ayuntamientu como condicionante a la rebaxa d'un añu na pena de cárcel.
   De la mesma maneera, indicó-yos que deben abonar una multa de 2.160 euros como venía fixáu na primer sentencia, pese a que l'indultu del Conseyu de Ministros nun apaez. Asina lo indicaron los sindicalistes en declaraciones a los medios, tres recoyer la comunicación del indultu de manes del maxistráu.
   De nun pagar esta multa o la indemnización al Conceyu, como yá anunciaron que fairíen, l'indultu nun tendría efectu y deberán cumplir trés años de prisión, a los qu'habría de sumar 180 díes de cárcel pol non abonu de los 2.160 euros y l'embargu de los bienes pa compensar al Conceyu.
   Pa Morala y Cándido esta ye "una nueva condena" a dos años que-yos obliga amás a "indemnizar al Conceyu y a pagar una multa". Amás, señalaron que lo que se pretende ye que "nun exerzan aición sindical", demientres cuatro años pa "que naide proteste pola situación de paru y el zarru de los astilleros".
   Los dos representantes sindicales presentarán alegaciones al pagu de la multa'l próximu martes 13 d'ochobre y adelantaron que nun piensen "pagar" al Conceyu, dao que se consideren "inocentes". Morala, que con un megáfonu informó de les condiciones impuestes pol xuez a les peersones que se concentraron frente a los xulgaos p'apoyalos, indicó qu'agora "la pelota ta nel teyáu del Conceyu".
   Según él, el qu'agora tengan que pagar la multa ye "una vuelta de tuerca del xuez", dao que nun figura na resolución del indultu que-yos llegare al traviés d'un telegrama. De la mesma manera, señaló que se trata d'un "complot" del Ayuntamientu pa metelos na cárcel. "nun mos perdona que mos opunxéremos al zarru de los astilleros", reprochó.
ÁNIMOS
   Pela so parte, Cándido agradeció a les más d'un centenar de persones elllí concentraes el so apoyu por nun dexalos solos. "Damos ánimu", aseguró. Tamién criticó l'actuación del Conceyu y del xuez que, según él, "tien la facultá pa facer lo que-y dea la gana". "El martes sabemos si subiremos pa Villabona porque nun vamos pagar", aventuró. "Esto ye un secuestru al movimientu sindical, nun lo vamos permitir", dixo.
   Per otru llau, a entrugues de los periodistes, Cándido reconoció qu'ayeri hubo contactos a nivel particular per parte de xente de la Plataforma contra la Represión y poles Llibertaes con IU de Xixón, y en concreto col voceru, Jesús Montes Estrada, que-yos aseguró que nun se diba personar l'Ayuntamientu güei pa reclamar la indemnización.
   Cándido señaló que'l Conceyu nun taba citáu güei, sinón sólo ellos, polo que nun tenía sen que fueren. El representante de CSI llamentó que Montes Estrada actúe como lo fai cuando foi compañeru d'ellos nel sector naval y reprochó que tea "calláu"  non sólo nel procesu contra ellos, sinón ante'l zarru de los astilleros. Pa él, adopta una posición "denigrante y antisocial".
   Tamién apuntó qu'estudiarán col so abogáu formulaciones de les alegaciones contra la multa impuesta y que valorarán pidir un esclaramientu al Gobiernu sobre l'indultu concedíu pol Conseyu de Ministros. Sobre esti tema, indicó que siempre fueren totales nel casu de temes llaborales, y agora a ellos dan-yos ún parcial. El documentu coles alegaciones presentaránlu'l próximu martes, a les 10.00 hores.