ArcelorMittal ta estudiando ampliar l'ERE seis meses más

Gonzalo Urquijo, director xeneral d'ArcelorMittal, dixo que dende la multinacional tan estudiando la posibilidá d'ampliar seis meses la duración del espediente de regulación d'empléu (ERE), que ta aplicándose dende esti branu pasáu y qu'afecta a les dieciseis plantes del Estáu, incluyíes les asturianes de Veriña y Avilés.

El director xeneral d'ArcelorMittal conseñó que cuando s'aprobó l'espediente afitóse la posibilidá de prorrogalu durante seis meses, concretamente hasta xunu de 2010. Esta anuncia fíxola tres la presentación de les cuentes de la compañía hasta setiembre. Asimesmo señaló qu'anque recuperóse l'actividá, "hai que ser prudentes" y siguir "adaptado la so producción a la demanda".

Urquijo afitó qu'anque l'ERE fina n'avientu la "nuesa idea yera amplialu", sicasí "habrá que negociar esta posibilidá colos sindicatos", y añadió que l'ERE ye "una bona ferramienta y da flexibilidá". No que cinca a les llínees zarraes n'Asturies de pintura y de galvanizáu, Urquijo conseñó que la so reapertura ta condicionada a la evolución de la demanda.

Nes cuentes asoleyaes, ArcelorMittal perdió entre xineru y setiembre 697 millones d'euros anque nel tercer trimestre del añu ganó 631 millones, colo que regresó a beneficiu depués de trés trimestres de pérdides.