Abertal califica de “radicales y antidemocráticos” a los que s’oponen a la recepción de la TVG nel Navia-Eo

L’asociación eonaviega Abertal vien de criticar los “sectores más radicales y marxinales del asturianismu políticu” que s’oponen a que la TVG puea vese nel Navia-Eo. Ente estos sectores señalaron “les manifestaciones ridícules” de l’Academia de la Llingua Asturiana, del diputáu d’IX Francisco Javier García Valledor o les “desafortunaes” declaraciones de l'alcaldesa d’El Franco, Cecilia Pérez. Pal coleutivu, estes actitues nun deben ser teníes en cuenta por “antidemocrátiques y oponese a la llibertá de llibre elección d’información del ciudadanu”.

L’asociación, presidida pol miembru de la Real Academia Galega Carlos Varela, sofitó públicamente al traviés de la so web la iniciativa del Gobiernu gallegu, “postura defendida por toles fuercies gallegues y pol Presidente Zapatero”. El coleutivu quier que’l Principáu roble un alcuerdu cola Xunta de Galicia pa la emisión recíprocua de TVG y TPA nel Navia-Eo y n’A Mariña lucense.

Del mesmu mou, esclarien que la midida foi bien acoyida ente la mayoría d’alcaldes del Navia-Eo, “lo que respuende a una nidia demanda social”. P’Abertal, la recepción de la TVG ye importante pa la recuperación “de la llingua gallega del Eo-Navia” y la discriminación que sufre l’Occidente d’Asturies.