La prensa catalana publica un editorial conxuntu a favor del Estatut

|

Nun fechu ensin precedentes na prensa del Estáu, doce diarios catalanes publiquen güei xueves un editorial conxuntu baxo’l nome de “La dignitat de Catalunya/La dignidad de Catalunya”, onde espeyen nuna sola voz el desalcuerdu de la sociedá catalana con un posible recorte del Estatut pol Tribunal Consitucional. Un testu que ye frutu d’un doble pautu políticu, Parlamentu de Cataluña y Cortes Xenerales, y qu’amás, foi sancionáu polos electores, sentencien.

Diari de Girona, Diari de Sabadell, Diari de Tarragona, Diari de Terrassa, El 9 Nou, El Periódico de Catalunya, La Mañana, La Vanguardia, Regió 7, Segre, El Punt y Avui faen un llamáu al Tribunal Constitucional, yá que consideren que nun ta preparáu pa dictar sentencia yá que namás seis de los doce miembros del TC tán fuera de percance o de prórroga del so mandáu: hai un miembru muertu, ún recusáu y otros cuatro tán exerciendo cuando yá finó’l so mandáu.
 
Nel editorial alerten que’l Constitucional nun va decidir namás sobre'l recursu del Partido Popular contra una llei orgánica del Estáu, yá que l’altu tribunal “decidirá sobre la dimensión real del marcu de convivencia español”. Los diarios recueyen que ta en xuegu “la mesma dinámica institucional” y “l‘aceptación de la madurez democrática d’una España plural o’l bloquéu de la mesma”.
 
No que cinca a la identidá catalana, na editorial pue lleese que la sociedá ta farta d’aguantar la mirada airada de los que siguen percibiendo la so identidá como’l defeutu de fabricación qu’impide qu’España algame la suañada ya imposible uniformidá. Del mesmu mou, faen referencia a la situación del idioma, “una llingua qu’en llugar de ser estimulada, ye sometida tantes vegaes a la obsesión del españolismu oficial”.
 
Nel editorial conxuntu dizse que la sociedá catalana acata les lleis, paga impuestos y que contribúi a la tresferencia de rentes a “la España más probe”. El testu fina faciendo un llamáu a nun confundir el clima críticu d’anguaño de los catalanes haza la política cola indiferencia, “nun tamos énte una sociedá fráxil, postrada y dispuesta a asistir al menospreciu de la so dignidá". Asina, finen los doce diarios col mensaxe ”si ye necesario, la solidaridá catalana volverá articular la llexítima respuesta d’una sociedá responsable”.
 
Pues lleer equí la versión en castellán del editorial nel diariu La Vanguardia

Contador Estadistiques