L'alcalde de Lleón, Francisco Fernández, dixo qu'entrar nun debate políticu sobre la construcción de la llinia Sama-Velilla nun beneficia a la postura de Lleón contra'l proyeutu.

Fernández pronuncióse d'esta manera a preguntes pol malestar manifestáu polos integrantes del movimientu cívicu contra la llinia d'alta tensión tres la última visita a Lleón del presidente del Gobiernu, José Luis Rodríguez Zapatero, na que nun se posicionó a favor nin en contra de la execución de dicha infraestructura.

Zalia y Aena firmaron un conveniu pa la cesión al Aeropuertu d'una panera del sieglu XIX, nel marcu del compromisu compartíu pal caltenimientu y promoción del patrimoniu cultural.

Zalia (Zona d'Actividaes Loxístiques y Industriales d'Asturies), previa autorización de la Conseyería competente en materia de Cultura acordies con la Llei de Patrimoniu Cultural, cede la panera a Aena pa la so colocación y esposición nun espaciu públicu de la infraestructura aeroportuaria.

Bloque por Asturies acusó a la Direutora Xeneral de Política Llingüística, Consuelo Vega, de tar na "primer llinia de fueu del discursu acomplexáu y paletu d'amigos de los bables".

El voceru de la organización, Pablo Fernández, criticó asina les declaraciones de la responsable autonómica, qu'ayeri, nuna entrevista en Radio Nacional afirmaba qu'en casu de plantegase la oficialidá del asturianu, será na próxima reforma del Estatutu d'Autonomía, pero cuestionaba qu'hubiere apoyu bastante.

El Tribunal Superior de Xusticia anula’l nomamientu de más de 250 puestos de Xefes de Serviciu, Coordinadores, Asesores, Analistes, Interventores y asemeyaos del Principáu.

El Conceyu por Otra Función Pública n´Asturies, que foi quien entamó la demanda, diz qu’otra vuelta la xusticia refierta-y al gobiernu d’Areces que’l sistema ordinariu de promoción na función pública ye’l de concursu de méritos y non la llibre designación a deu, “que ye lo que quier esti gobiernu clientelista pa poner nos cargos burocráticos a los funcionarios que-y pete y caciplar per ellos”.

La secretaria xeneral del PP dixo que'l partíu va tener n'Asturies "el meyor candidatu" y aseguró que nun conoz l'escritu a favor de que l'ex ministru Álvarez-Cascos seya la cabeza de cartelu.

L’Arribada zarró'l plazu de candidatures pa los Premios Timón, convocaos dende’l mes d’avientu. Pa esta edición, opten a los galardones escritores que ñacieren en 1960 o anteriormente.

La 1 de TVE ye la canal más vista nel país, siendo Asturies la Comunidá onde más se ve la TV de pagu y una de les poques autonomías onde les temátiques de la TDT nun llideren.

Los asturianos siguen prefiriendo La 1 de TVE, con un 18,9% d’audiencia, anque pierde un 1,4% d’espectadores. Telecinco ye la segunda canal favorita de los asturianos, ganado un 0,3% respeuto al mes anterior y quedándose col 16,6% d’audiencia.

El primer ministru israelín, Benjamin Netanyahu, ta considerando introducir un proyeutu de llei pa imponer sanciones a los prisioneros de seguridá palestinos.

La nieve cayida obligó a zarrar el pasu de camiones pel Puertu de Payares. Amás, atópase zarráu al tráficu'l puertu de La Cubilla en Ḷḷena, según información del 112-Asturies.

El CAO considera les declaraciones d'Areces, "un insultu a la intelixencia", yá que "toles encuestes y estudios demostraron qu'una amplia mayoría ta a favor de la oficialidá".

Al traviés d'una nota prensa, esta agrupación de coleutivos, asociaciones, sindicatos y partíos respondió asina a les declaraciones que'l presidente del Principáu fixo'l pasáu xueves, nes que consideraba que les postures a favor de la oficialidá son "minoritaries".