La Comisión Europea decidió abrir procedimientu d'infracción a España pol alcuerdu ente la Conseyería d'Economía y Jovellanos XXI pa la construcción del Palaciu de Xusticia.

La Xunta pola Defensa de la Llingua llamó a sumase a la manifestación pola oficialidá d'esti vienres, al empar que criticó les declaraciones d’Areces y Consuelo Vega contra la oficialidá.

La organización presentó güei en rueda de prensa la manifestación que va pidir la oficialidá del idioma del país el próximu vienres 7 de mayu, Día de les Lletres Asturianes. Nel actu tuvieron presentes el voceru de la Xunta, Carlos Pulgar, y la militante de la organización María Xosé Martínez.

L'alcaldesa de Xixón, Paz Fernández Felgueroso, afirmó que'l Conceyu va entamar actividaes complementaries si Uviéu llogra proclamase como capital cultural europea nel 2016.

La Xunta Xeneral, en collaboración cola Conseyería de Cultura, celebra güei, a les 13.00 hores, nel Salón Europa, l'actu institucional de llectura de testos n'asturianu.

L'actu, enmarcáu dientro de la XXXI Selmana de Les Lletres Asturianes, dedicada al poeta Xosé Antonio García, va presentalu la presidenta de la Xunta Xeneral, María Jesús Álvarez González, que va entamar tamién la llectura. De siguío, van siguir lleendo los conseyeros de Cultura, d'Educación y de Bienestar Social.

Xuventú Asturianista celebra esti xueves, un “Homenaxe a los escritores en llingua asturiana, pola oficialidá”, na Llibrería Alborá de Xixón. Amás, van presentar la so nueva imaxe.

El númberu d'autónomos afiliaos a la Seguridá Social sigue menguando n'Asturies. Asina, de 79.258 afiliaos de xineru, pasamos a 78.929 n'abril, un total de 329 autónomos menos.

Sicasí, la Confederación Nacional d'Autónomos y Microempreses apuntó que la perda de trabayadores por cuenta propia de marzu a abril namás esperimentó seis baxes. Pero Asturies sigue representando una parte bien pequeña del colectivu d'autónomos españoles, apurriendo namás el 2,5 por cientu del total.

Nesti mes d’abril que ta acabantes de finar, el Centru de Terminoloxía Asturiana (Termast) entamó a ufrir a los falantes les propuestes de terminoloxía matemática y de medicina.

La primera, xubida’l 14 de mayu, ye ‘Terminoloxía Matemática’, una obra de Rubén Fernández Martínez, quien nes pasaes Xornaes d’Estudiu de l’Academia ufrió una conferencia sobre los nomes del aire nel nuesu país; ‘L’aire n’Asturies: un averamientu a la cultura del aire al traviés del léxicu’.

El Colectivu de Colombianos Refuxaos n'Asturies convoca a los sindicatos y organizaciones a un actu en memoria'l d’Henry Ramírez, el 6 de mayu a les 20 hores na Plaza Mayor de Xixón.

La Generalitat Valenciana acepta'l títulu de Filoloxía Catalana pa desimir de la prueba de valencianu nes oposiciones a maestru. La midida vien depués de trenta sentencies qu’asina lo esixíen.

La nueva vien de ser asoleyada nel diariu oficial del vienres pasáu, depués de que sindicatos como CCOO y asociaciones culturales presentaren dellos recursos, que siempre dieron sentencies contraries al Gobiernu valencianu.

Más de 200 escolinos de los IES de la Comarca d’Avilés participaron esta mañana nes Xuntes d’Escolinos, onde los mozos y moces fixeron un homenaxe a Xosé Antonio García.

Inaguró la xornada de les VII Xuntes d’Escolinos nel Auditoriu d’Avilés el conceyal de cultura, Román Álvarez, qu’animó a tolos mozos presentes a conservar la cultura asturiana pa que nun se pierda, “tenemos una llingua propia y esperemos que los vuestros fíos puean deprendela como faceis vosotros”.