El Plenu del Senáu aprobó estudiar una reforma del Reglamentu pa xeneralizar na Cámara l'usu de les llingües del Estáu, eso sí, que seyan oficiales nes sos Comunidaes.

Entamen les actividaes de ‘L’Arribada 2010’, nesti casu les que correspuenden a la estaya ‘Rolda 2010’ con una mesa redonda sobre los diarios dixitales n’asturianu.

Nel alderique quier abrise un debate sobre la realidá de los medios redactaos na nuestra llingua esistentes na rede, dende los xeneralistes a los de conteníos culturales. L’actividá ta programada pal viniente vienres, 30 d’abril, a les 20:00 hores. El llugar sedrá’l Centru Municipal Integral de L’Arena, en Xixón Nº cai Canga Argüelles, 16-18.

Unidá Nacionalista Asturiana sumóse a la 'Declaración contra la incineración y a favor d'un pautu sociopolíticu pa la xestión sostenible de los residuos d'aniciu nel llar'.

El voceru de medioambiente d'UNA, Tino Fernández, considera básico concienciar a la sociedá asturiana de los riesgos inasumibles de la incineración. Pa la organización, ye necesario informar a la sociedá asturiana "tanto de los riesgos remanecíos de la incineración como de les alternatives esistentes y viables a la macroincenadora de Serín".

El miércoles 5 de mayu preséntase nel Posafuelles el discu añal de la Xunta pola Defensa de la Llingua, nesta ocasión esplora la rellación ente música asturiana y electrónica.

‘Asturllétric’ ye’l discu que quier sirvir de banda sonora a les movilizaciones qu’esti añu s’entamen a favor del asturianu. El CD incluí doce cantares, ente ellos ‘Ramu pola oficialidá’, el sestu cantar que compón Músicos pola Oficialidá pa sofitar la reivindicación llingüística. Los anteriores dende 2004 foron ‘Fala’, ‘Alantre’, ‘Arguyosu’, 'Garra  la pallabra' y ‘Ye lo que nos pasa’.

YouTube yá ufre un videu del XXII Conciertu pola Oficialidá, celebráu'l pasáu sábadu 24 de mayu na Feria de Muestres de Xixón. El videu ye obra del realizador candasín Pablo A. Quiroga.

Xentiquina, DRD, La Curuxa, Toli Morilla, Misiva, Skama la Rede, Los Berrones y Dixebra foron los grupos qu'ufrieron más d’ocho hores de música, reivindicación y folixa, en dos escenarios independientes que s'alternaron coles actuaciones ensin tiempos muertos nin descansu.

El PCE entregó nel Congresu les 35.150 firmes qu'axuntó en tres meses pa la campaña '¿En qué gastes el mio dineru?' pa esixir que les cuentes de la Casa del Rei seyan públiques.

Esta campaña, qu'entamó en Madrid el pasáu 20 de xineru, acabó'l 9 d'abril y desarrollóse pente medies de la colocación de meses de distintos conceyos y tamién al traviés d'internet. Concretamente, 25.371 firmes van en pliegos, 5.502 algamáronse al traviés d'internet, y 4.277 pente medies d'adhesiones en redes sociales.

La Coordinadora Ecoloxista d’Asturies y l'Asociación de Xuristes contra'l Ruiu afirmen qu’l nivel sonoru mediu diariu nes ciudaes asturianes supera los valores almitíos na lexislación.

Mañana, 29 d'abril, celébrase'l Día Internacional de Concienciación sobre'l Ruiu y afirmen que d'alcuerdu a los datos facilitaos pol Principáu de les sos estaciones de control de contaminación el tiempu que tuvieron funcionando, superen los 65 decibelios que ye'l nivel sonoru establecíu pola OMS (Organización Mundial de la Salú) como llende de tolerancia al ruiu.

Darréu va celebrar el 1 de mayu en Llangréu con una marcha y una espicha cola que quieren denunciar la “llacediosa situación d’Asturies”, la represión y el capitalismu.

Baxo’l llema ‘La crisis social que la pague’l capital’, dende  Darréu quieren convidar a tola sociedá llangreana y asturiana a amestase a la convocatoria xunitaria que proponen. “Nesti 1 de mayu queremos denunciar la llaceriosa situación que tamos sufriendo n’Asturies. Vamos camín de los 90.000 paraos y l’añu pasáu hubo más de 16.000 accidentes llaborales  nel país”, afirmen.

Un equipu de la revista británica “Food and Travel”, distribuida en dellos países anglosaxones, visita Asturies pa publicar un reportaxe sobro la mariña y los sos productos.

El viaxe, que foi entamáu pola Sociedá Rexonal de Turismu en collaboración cola Oficina Española de Turismu en Londres, va traducise nun reportaxe d'ocho a diez páxines.