L'Arribada zarra'l plazu de candidatures pa los Premios Timón

L’Arribada zarró'l plazu de candidatures pa los Premios Timón, convocaos dende’l mes d’avientu. Pa esta edición, opten a los galardones escritores que ñacieren en 1960 o anteriormente.

L’asociación va convocar dos xuraos, ún por cada modalidá, IV Premiu Timón, p’autores en llingua asturiana y n’eonaviego, y del I Premio Timón p’autores asturianos en castellanu, integraos por persones vinculaes a la cultura del país. Esta distinción, que consiste nuna obra del escultor y ceramista xixonés Jesús Castañón, va entregase durante la cellebración de L’Arribada 2010, dientro de la so estaya Vagamar, que va facese del 18 al 25 de setiembre.

Los candidatos definitivos son pal IV Premiu Timón, Pablo Ardisana, Manuel Asur, Roberto González-Quevedo y Miguel Rojo. Mientres que pal I Premio Timón son Fulgencio Argüelles, Carlos Bousoño, Ángeles Caso, Luis Fernández Roces, Carmen Gómez Ojea, Carmen Ruiz-Tilve y Gonzalo Suárez.

Los ganadores anteriores foron, en 2007, Nené Losada Rico, en 2008, Xuan Xosé Sánchez Vicente y, en 2009, Manuel García ‘El Galano’.