UNA pide l'absolución de los sindicalistes de CSI

El Secretariu d'Organización d’UNA, Roberto Holgado, pidió la devolución de la primer planta de la casa sindical d'Avilés y esixe la llibre absolución de los sindicalistes de la CSI.

Holgado participó con otros militantes d’Unida Nacionalista Asturiana na concentración de sofitu a los sindicalistes del martes y tresmitió'l malestar de la organización  cola actuación de la fiscalía actuación contra los sindicalistes de la CSI pola ocupación de la primer planta de la casa sindical d'Avilés, cedida a FADE y abandonada dende va años.

Holgado afirmó nun entender qu'un recursu que tien que ser pa defender los derechos de los trabayadores, “como ye la casa sindical”, tea en manes d'una organización empresarial, “y muncho menos que se-y dexe tenela abandonada años” col agravante de que “organizaciones sindicales, como la mesma CSI, con representación n'Avilés nun disponen d'espaciu propiu en tala Casa Sindical”, comentó.

Tamién resaltó que l'aumentu de pena solicitada pol fiscal énte la negativa de los sindicalistes a aceptar los cargos que se-y imputaben, abulta más propiu d'un actu de represión sindical que de xusticia, que según Holgado tuvo más cerca d'un “traga y calla” que d’un intentu de conciliación.

“Ye necesario que’l Gobiernu central se replantegue la concesión de la primer planta de la casa sindical d'Avilés a la FADE, porque amás de ser inxustificable por sigo mesma, l'abandonu per parte de los empresarios de la mesma amuesa lo erróneo de la decisión y esixe que se devuelva a los representantes de los trabayadores”, señaló Holgado.

Pa finar, esixó a la fiscalía que retire los cargos contra los sindicalistes de la CSI, “porque la so actuación foi pacífica y nun provocó dañu nengún como reconoz el mesmu informe policial, cosa per otra parte imposible al tar el local abandonáu, y trátase polo tanto d'una mera protesta y reivindicación sindical que de nenguna manera pue ser sancionada”

Pa Holgado, lo contrario sedría una amosanza más del calter represivu del gobiernu de PSOE ya IX colos trabayadores, “que tienen el cinismu de dicir defender” y concluyó indicando que'l calter represivu del actual Gobiernu asturianu tamién se reflexó nel desproporcionáu dispositivu de seguranza desplegáu énte la protesta pacífica fecha’l martes en sofitu de los compañeros imputaos, “que buscaba la intimidación de los participantes y en nengún casu caltener la seguranza”.