Areces confirma que nun va volver presentase

Areces comunicó al Secretariu Xeneral de la FSAy al Secretariu Xeneral del PSOE que nun va volver a ser candidatu a la Presidencia d'Asturies pa les eleiciones de mayu de 2011.

“Considero que ye la decisión correcta depués de tres lexislatures nes qu'actué siempres con total llealtá al Partíu Socialista, a los nuesos electores y tamién a tol pueblu asturianu, destinatariu últimu del nuesu trabayu dende l'acción de gobiernu”, afirmó güei’l Presidente nuna rueda de prensa ensin turnu de preguntes.

El xefe del Executivu calificó los sos 12 años como Presidente d'Asturies como una etapa na qu’Asturies “avanzó notoriamente na so modernización y remató un tresformamientu económico y social que funde los sos raigaños na reconversión de los nuesos sectores productivos tradicionales”.

Areces afirmó que’l país ta portándose con mayor fortaleza énte la crisis, "frutu d'un trabayu desenvueltu dende la estabilidá política ya institucional, que contribuyó a crear un clima de convivencia bien positivu, productu tamién del diálogu y la concertación permanente colos representantes sociales ya institucionales asina como la sociedá civil”.

Ente los pegoyos del so mandatu, el Presidente solliñó primeru la estabilidá institucional, "que se caltuvo en situaciones de mayoría absoluta como de mayoría simple, con gobiernos d'un solu partíu o de coalición y que favoreció un desenvolvimientu positivo y siguío mientres estos años”.

Del mesmu mou faló d’una diversificación económica, “pasemos d'una Asturies dependiente a una economía que combina la so tradición industrial con nuevos sectores como'l turismu, los servicios o les nueves tecnoloxíes”. Tamién resaltó’l desenvolvimientu de les infraestructuras tantu de comunicación como culturales, asina como pa la prestación de servicios públicos.
 
Areces afirmó que caltién el so compromisu colos proyeutos en marcha, “compromisu electoral colos asturianos”, y dixo que nel momentu actual de crisis había que poner en valir los intereses d’Asturies, “percima d'otres llexítimes aspiraciones individuales o de grupu”.

El mandatariu autonómicu afitó que caltién la voluntá de siguir executando les midíes y axustes necesarios pa contribuyir a qu'Asturies sala reforzada d'esta crisis, “too ello ensin arrenunciar al modelu económico y social que desenvolvimos mientres estos años”.
 
“Estos motivos, impúlsenme a treslladar públicamente la mio decisión nesti momentu, pa concentrar asina tol esfuerzu del Gobiernu n'algamar los oxetivos nun contestu económicu complicáu y, per otra parte, pa que los socialistes podamos empecipiar cuanto antes el procesu que nos debe conducir a una nueva etapa de gobiernu n'Asturies”, afirmó.

Pa rematar quixó amosar la so gratitú al so partíu, a les persones coles que compartió responsabilidaes, a la so familia y a los asturianos, “tres mandatos como alcalde de Xixón y otros tres como Presidente d'Asturies ye un caudal d'enfotu tan enorme que me resulta difícil poder espresar tol agradecimientu que siento”.