L’asturianu nun suena nel dial

El Principáu concedió diez llicencies de radio, ente los requisitos pa l’axudicación nun esistía’l fomentu del idioma. Mientres, sigue ensin iguase la situación de Radio Sele.

El Gobiernu, al traviés de la Conseyería d'Alministraciones Públiques y Vocera del Gobiernu, resolvió la concesión de diez nueves llicencies de radio que van suponer, según el compromisu de los axudicatarios, una inversión de 2,7 millones d'euros y la creación de setenta puestos de trabayu. A les llicencies concursaes presentáronse 127 proyeutos.
 
La puntuación pa la concesión de la llicencia, de 0 a 100, desglósase nos siguientes requisitos: Fomentu cultural (hasta 30 puntos), conteníos (hasta 20 puntos), pluralismu informativu (hasta 10 puntos), viabilidá económica (hasta 10 puntos), viabilidá técnica (hasta 10 puntos), compromisu de non cesión a terceros (hasta 10 puntos) y accesu nueves empreses (hasta 10 puntos).

Les concesiones foron n’Uviéu (SER, Soninorte, Nuevas Iniciativas Audiovisuales), Xixón (El Comercio), L.luarca (Kiss Radio, Economía por Ondas), Navia (Editorial Prensa Asturiana) , Taramundi (Radiofusión del Principado), Avilés (SER) y Cangues d’Onís (Propulsora Montañesa).

Ensin llingua nes ondes

Ente los requisitos pa la concesión de la llicencia nun hai un puntu onde s’afite’l fomentu del idioma del país, ye de reseñar que l’Estatutu y la Llei d’Usu recueyen que’l Gobiernu tien que velar pola promoción del asturianu nos medios de comunicación.

La situación de les nueves concesiones vien depués de que’l pasáu marzu, el Congresu de los Diputaos aprobó encamentar a les comunidaes autónomes a revisar aquellos casos reconocíos por instancia xudicial d'emisores radiofóniques d'ámbitu local que s'atopen en situación d’involuntaria d'irregularidá, amás d’encamentar al Gobiernu central a impulsar los compromisos suscritos cola Carta Europea de Llingües Minoritaries no referío a los medios de comunicación.

L’aprobación d’esta iniciativa nel Congresu nun supunxo nengún pasu alantre na situación de Radio Sele, emisora qu’emite dafechu n’asturianu dende 1986 y a la que’l Tribunal Superior de Xusticia d’Asturies reconoció como dueña d’una llicencia d’emisión na FM.