Suatea diz que la etapa d’Areces foi negativa

Suatea califica la etapa d’Areces como negativa. El sindicatu destaca los pasos haza atrás cola llingua, "como l'aprobación d'un currículu onde nun se menta l'idioma".

“El mandatu del Sr. Areces foi'l del villano d'esa mal llamada “carrera profesional” y la Llei d'Evaluación, discriminatoria ya inxusta como poques, amás de ceadora d'una fonda fendedura dientro del profesoráu”, afirmen dende’l sindicatu.

Suatea diz que con Areces vivimos una época onde destacó la falta de respetu a les sentencies de los xueces y  la “chambonada” y la improvisación, “al traviés del Sauce, del Adolfo Posada nes oposiciones, de los inxustificables retrasos nes convocatories, de los retayos de plantiyes, de la negación de desdobles”.

No que cinca a la situación llingüística, solliñen el frenu a la reforma estatutaria onde s’inxertare la oficialidá, l'aprobación de currículu d'Educación Infantil onde nin se menta'l nuesu patrimoniu llingüísticu, de la falta de reconocencia de la especialidá de llingua asturiana, la non inclusión nes plantiyes de los puestos d’asturianu y gallego-asturianu, amás de la non combocatoria d’oposiciones por esta especialidá.

En resume, califiquen la etapa como de precarización de les condiciones llaborales y de la calidá de la enseñanza pública. “Tamién foi'l del vaciáu de competencies en materia de personal de la Conseyería d'Educación, el mandatu que vio esaniciase la capacidá llexítima del profesoráu asturianu del so derechu a la negociación, por torgar primero la convocatoria de la Mesa Sectorial d'Educación a lo llargo de cuasi dos años, ya intentar depués la so  manipulación y anulación, de la mano de personaxes como'l Director Xeneral de Función Pública y dellos sindicatos”, afirmen.

Pal sindicatu, na etapa d’Areces la enseñanza privada viose favorecida cola meyora de les sos condiciones al traviés de los conciertos educativos, “siempres a cuenta de la enseñanza pública, dándose casos nos que cuasi la metá del alumnáu de delles zones, como ye'l d'Avilés, pertenecen yá a esa rede mentanto que la pública tien importantes faltes de medios”.

Dende Suatea esperen que la persona que nel futuru dirixa'l Gobiernu d'Asturies, cambie dafechu de rumbu y amuese un compromisu claru cola educación pública asturiana  y los sos trabayadores.