La Comunidá Asturiana d’Ubuntu, col sofitu del Conseyu de la Mocedá de Xixón, va entamar un taller de microcursos d’Ubuntu. Estos cursinos van dase tol añu, caracterizándose pola so brevedá: quince minutos de duración cadún.

“Deprender lo más básico de la informática dende Ubuntu”; esi ye l’oxetivu que la recién creada Comunidá Asturiana d’Ubuntu tien con estos cursos. Pa ello, tolos vienres de 20.15 a 20.30 nel Conseyu de la Mocedá de Xixón van tener llugar estos talleres.

La escritora xixonesa Iris Díaz Trancho va presentar la so novela infantil “Mio ma, la pirata”. Ilustrada por Gloria Caamaño y editada por Suburbia Ediciones, la presentación va dase’l prósimu 11 de setiembre na FNAC de Parque Principáu.

Como'l títulu indica Mio ma, la pirata, ye una hestoria de pirates anque atípica: Barba Negra lleva un restaurante y Barba Roxa ye xastre. La ma del nenu protagonista sigue surcando los mares buscando barcos que prindar y ayalgues escondíes. Con ayuda de la perra Pulga entamen un viaxe a Madagascar en busca del mayor tesoru de toos.

El ministru de Trabayu y Inmigración, Celestino Corbacho, va dexar pronto’l Gobiernu de José Luis Rodríguez Zapatero. L’oxetivu del políticu del PSOE ye dir nes llistes del PSC nes elecciones catalanes de la seronda.

Corbacho comunicó la so intención de volver a la política catalana nun primer momentu al líder del PSC y presidente de la Generalitat, José Montilla, nuna xunta'l pasáu día 4 d'agostu. Darréu, comunicólo al xefe del Executivu español y líder del PSOE.

El númberu de paraos rexistraos n'Asturies subió en 1.281 persones n'agostu, un 1,79 por cientu sobre'l mes anterior, polo que'l total de desempleaos asitióse en 72.956, según los datos fechos públicos pol Ministeriu de Trabayu y Inmigración.

En comparanza con agostu del 2009, el paru aumentó n'Asturies un 6,61%, esto ye, 4.523 persones más, mientres que n'España subió un 9,38%, al rexistrase 340.581 persones nes oficines d'empléu.

El Bloque por Asturies vien de calificar de “fracasada” la política económica del Principáu. Consideren que’l aumentu del paru n’agostu en 1281 persones amuesa la “incapacidá pa crear empléu estable y de calidá” y ven un futuru “esmolecedor”.

Un conceyu de xuntes llocales del PP asturianu aprobó un comunicáu nel que propón  a Pilar Fernández Pardo,  Joaquín Aréstegui y a Isabel Pérez Espinosa como candidatos pa les próximes elecciones. Cascos nun ta incluyíu.

Yá entamaron les conversaciones ente palestinos y israelinos en Washington. El presidente palestín, Mahmud Abaas, pidió a Israel el cese del bloquéu sobre Gaza, mientres que Nenyahu, presidente israelín, faló de “concesiones doloroses”

La secretaria d'Estáu norteamericana, Hillary Clinton, foi la encargada de dar por inauguraes les conversaciones directes ente palestinos y israelinos en Washington esti xueves na sede del Departamentu d'Estáu.

La Conseyería de Mediu Ambiente, Ordenación del Territoriu y Infraestructures ta desarrollando un censu añal d'oses con cría en dellos conceyos d'Asturies. Los resultaos conocíos hasta’l momentu confirmen l'enclín a l'alza de la población d'esta especie.

La creación audiovisual tien la so capital en Villaviciosa esti fin de selmana col Mediu Güeyu Festival. Esti eventu va axuntar un concursu de curtiumetraxes asturianos, un taller de cine, proyecciones d’artistes independientes y música en vivo.

Nacíu del interés pol cine d’un grupu de mozos de Villaviciosa, el Mediu Güeyu Festival amesta creación audiovisual de dientro y fuera d’Asturies ente’l 2 y 5 de setiembre. El platu fuerte del eventu ye’l concursu de curtiumetraxes nel que participen más de 200 obres.

Mañana’l Principáu va presentar los actos de la Selmana Europea de la Prevención de Residuos. Acordies a esto, la Coordinadora Ecoloxista d'Asturies insiste n’abandonar el proyectu de incineradora de residuos y apostar por reciclaxe.

Al traviés d'una nota de prensa, repiten que lo qu'hai que facer ye “trabayar nes polítiques de los trés erres: amenorgar, recuperar y reciclar”. Llamente amás qu'Asturies tea "a lo cabero" de les tases d'amenorgamientu de residuos y de reciclaxe d'España según los datos del Ministeriu de Mediu Ambiente.