Pardo, Aréstegui y Espinosa, posibles candidatos del PP asturianu

Un conceyu de xuntes llocales del PP asturianu aprobó un comunicáu nel que propón  a Pilar Fernández Pardo,  Joaquín Aréstegui y a Isabel Pérez Espinosa como candidatos pa les próximes elecciones. Cascos nun ta incluyíu.

"Con esta terna que proponemos pa que Mariano Rajoy escueya, respetando asina'l so lideralgu, tamos uniendo al PP al rodiu de la próxima candidatura autonómica", caltienen nel documentu nel que proponen como candidatos p’Asturies a a la presidenta del PP de Xixón y diputada estatal, Pilar Fernández Pardo, al presidente del PP d'Avilés, Joaquín Aréstegui y a la conceyala del Conceyu d'Uviéu, Isabel Pérez-Espinosa.

Pa los representantes de les xuntes, la condición necesaria "pa una candidatura ganadora" ye que "represente, integre y motive al partíu". Asina, señalen que los tres propuestos son candidatos "con opciones de trunfu", porque parten d'una "bona base", la del apoyu del Partíu Popular d'Asturies.

Ente les persones que roblen el comunicáu alcuéntrense destacaos miembros del PP asturianu como Gabino de Lorenzo, alcalde d’Uviéu y presidente d’Uviéu del PP, o Ramón Artime, secretariu xeneral del PP  y teniente d'alcalde de Gozón. Al empar esclarien que la so postura nun pretende exercer "nenguna presión" sobre Mariano Rajoy, nin sobre la Dirección Nacional del Partíu.

Cascos nun ta incluyíu
Según el comunicáu, al que tuvo accesu Europa Press, na llista nun apaez l'ex ministru de Fomentu, Francisco Álvarez-Cascos, al qu'acusen de "querer volver a la política tres siete años d'alloñamientu". "¿Cómo pue dalguien pensar nuna candidatura autonómica encabezada pol que cuenta col refugu de la inmensa mayoría del PP n'Asturies?”, entruguen los miembros del PP, cuestionando la figura de Cascos.