Ente’l 1 de setiembre y el 31 d’ochobre van poder solicitase les ayudes pa compartir vivienda que convoca la Empresa Municipal de Vivienda de Xixón. Xóvenes estudiantes de FP y d’Universidá ente 18 y 35 años son los beneficiarios.

Xixón enllenase esti miércoles 1 de rock y folk de raigañu. De la mano d’Algamar Producciones van aportar n’esclusiva a Asturies The Mahones, banda referencial de punk-rock celta. Actúen tamién los asturianos Sambre y Mezá.

Formaos en 1990, The Mahones ye’l grupu canadiense más destacáu del estilu conocíu como paddy-rock, un amiestu ente’l rock y el folk de calter célticu. Con ocho trabayos discográficos a les sos espaldes, aporten n’Asturies n’esclusiva pa presentar la xira del so 20 aniversariu.

Xixón acoyerá esti 8 de setiembre los actos de la Plataforma 8-S, qu'axunta a dellos colectivos políticos, sindicales y ciudadanos y que quier dar una respuesta a los actos oficiales. Bloque por Asturies y UNA son delles de les organizaciones que sofiten l'actu.

Depués de delles reuniones durante esti branu nes que foron perfilándose los detalles, delles organizaciones y colectivos apautaron una convocatoria conxunta pa dar una respuesta a los actos oficiales que'l gobiernu asturianu entama en Ribeseya.

El grupu d'investigación Seminariu de Filoloxía Asturiana de la Universidá d'Uviéu entama un Congresu que, baxo'l títulu «Ciencia, llingua y fronteres», va celebrase los díes 5 y 6 d'ochobre del 2010 na Facultá de Filoloxía d'Uviéu.

El Bloque por Asturies, al traviés del so grupu parllamentariu, ingresó nel rexistru de la Xunta Xeneral les preguntes al rodiu’l sistema de Rayos X de Llanes. Dende l’A.V.V de Celoriu “La Hoguera” agradecen la so “sensibilidá” y “apoyu” col casu.
 

El Dispositivu de Rayos X lleva 17 años años instaláu nel Centru Salú de Llanes, pero enxamás s’usó. Roberto Colunga, diputáu y portavoz del Grupu Parllamentariu Mestu, vien de llevar esta problemática a la Xunta Xeneral, con ocho entrugues empobinaes al Conseyeru de Salú.

L’agrupación del Partíu Asturianista de Xixón vien de pidir al so Ayuntamientu la instalación d’equipamientos públicos na zona rural. La reivindicación céntrase nel nuevu parque de Vega-La Camocha, carente d’esti tipu de mobiliariu.
 

El ministru d'Inmigración francés, Eric Besson, y el secretariu d'Estáu p'Asuntos Europeos galu, Pierre Lellouche, viaxen esti martes a Bruseles pa dar esplicaciones al Executivu comunitariu pola espulsión de persones d'etnia xitana .

Van recibilos a partir de les 14:30 hores pola vicepresidenta de la Comisión Europea y comisaria de Xusticia, Viviane Reding, y pola comisaria d'Interior, Cecilia Malmström. Tamién van xuntase con un representante de la dirección d'Empléu y Asuntos Sociales, porque'l comisariu d'esta cartera, Laszlo Andor, nun ta na capital europea.

La Comisión Permanente de la Xunta de Personal docente non Universitariu solicita aconceyase urxentemente cola Conseyería d’Educación. L’ente de profesores califica de “grave” la situación llaboral al empiezu del nuevu cursu.

Unidá Nacionalista Asturiana esixe al Conceyu de Sotu'l Barcu que tome midíes pa iguar la situación de La Calea, en L'Arena. Los nacionalistes denuncien desperfectos y rotures de tuberíes d’agua fecal que fain “cuasi impracticable” la zona.
 

Tino Fernández, portavoz de medioambiente d'Unidá Nacionalista Asturiana declaró que “ye una situación que vienen denunciando los vecinos dende cuantayá, ensin qu'hasta'l momentu s'iguare, lo que provoca un seriu perxuiciu pa los propios vecinos y los turistes que pasien pela zona".

La Conseyera de Presidencia, Xusticia ya Igualdá y Directora del Plan d'Incendios Forestales, María José Ramos Rubiera, activó a primer hora de la mañana de güei'l Plan d'Emerxencies de Protección Civil por Incendios Forestales nel Principáu d'Asturies (Infopa) en nivel 1, pol fueu declaráu na Reserva Natural Integral de Muniel.los, según informó'l Principáu.