Emprimen conversaciones directes ente Palestina y Israel

Yá entamaron les conversaciones ente palestinos y israelinos en Washington. El presidente palestín, Mahmud Abaas, pidió a Israel el cese del bloquéu sobre Gaza, mientres que Nenyahu, presidente israelín, faló de “concesiones doloroses”

La secretaria d'Estáu norteamericana, Hillary Clinton, foi la encargada de dar por inauguraes les conversaciones directes ente palestinos y israelinos en Washington esti xueves na sede del Departamentu d'Estáu.

El presidente palestín, Mahmud Abbas, aprovechó la so intervención inicial pa pidir a Israel que cese'l bloquéu sobre la Franxa de Gaza y que se suspenda cualquier actividá de construcción nos asentamientos."Pidimos al Gobiernu israelín que siga alantre colos sos compromisos de cesar toles actividaes nos asentamientos y que llevante dafechu l'embargu sobre la Franxa de Gaza", reclamó.

Pela so parte, el primer ministru israelín, Benjamin Netanyahu, que tomó la palabra primero qu'Abbas, mostróse dispuestu a avanzar rápido p'algamar un acuerdu de paz colos palestinos, anque alvirtió que pa ello ambes partes van tener que facer "concesiones mutues y doloroses".

"El pueblu d'Israel, y yo como'l so primer ministru, tamos preparaos pa percorrer esti camín y avanzar una llargu percorríu p'algamar una paz xenuina que traiga a los nuesos pueblos seguridá, prosperidá y bona vecindá", aseguró.

Posible pasu hacia la paz
Al entamu de la xunta, Clinton sorrayara que la presencia d'Abbas y Netanyahu consistía yá en sí mesma un pasu hacia la paz. "Al tar equí güei, caún de vosotros disteis un importante pasu palantre pa lliberar a los vuesos pueblos de los grilletes d'una hestoria que nun podemos cambiar y p'avanzar hacia un futuru de paz y dignidá que namás vosotros podéis crear", sorrayó.