Los estibadores d’El Musel vivieron esti xueves una xornada de güelga

|

Los paros de dos hores por turnu convocaos n’El Musel polos estibadores desarrolláronse con normalidá. Los trabayadores, que paralizaron un buque contenedor, reclamen que la carga de coches nuevos na Autopista del Mar sía llabor suyu.
 
Los sindicatos convocantes d’esta güelga, Coordinadora, CO OO y UXT, tán a la espera de que Puertos del Estáu los llame a una nueva xunta en Madrid pa intentar iguar el problema, yá qu’El Musel ye la única terminal del Estáu que nun utiliza estibadores pa la carga de coches nuevos, como ye’l casu del barcu de l'Autopista de la Mar que xune Xixón con Nantes-St. Nazaire. Tampoco lo faen con otros vehículos, como los que lleven remolque ensin conductor, dalgo que traten de solucionar con los paros convocaos.
 
El de güei, el primeru, llevó a la paralización d'un barcu portacontenedor y de los llabores d'entrega. Hilario Martínez (UXT), secretariu d'Acción Sindical de Gestiba, destacó’l siguimientu de los paros realizaos y señaló que nun se rexistró nengún problema. “Nun se trata de penalizar a nadie”, apuntó con alusión a que la güelga nun afecte a otros colectivos portuarios. Los paros del primer turnu celebráronse de 9 a 11 hores, mentes que los del segundu tuvieron llugar de 19 a 21 hores.
 
Hai que destacar que los estibadores xixoneses cuenten col apoyu de los sos colegues de Nantes, polo que nun se refuga que s'intenten retener los vehículos na población francesa a la so llegada nel ‘Norman Bridge’. Tamién tienen el sofitu de los estibadores del resto de puertos del Estáu, que que nun descarten realizar paros pola situación na que s’alcuentre los sos compañeros de Xixón.

Contador Estadistiques