Col envís de llevar el conflictu llingüísticu asturianu a Europa, Iniciativa pol Asturianu ta acabante d’incorporase a ELEN (European Lesser-Used Languages). Esta ONG trabaya na promoción y proteición de les llingües europees minorizaes.
La Xunta pola Defensa de la Llingua Asturiana (XDLA) ta recibiendo quexes sobre dellos institutos que tán poniendo torgues al enseñu de Llingua Asturiana. Ún d’ellos ye’l xixonés Calderón de la Barca, asitiáu nel barriu d’El Coto.
El BOE d’esti vienres espubliza que’l Plenu del Tribunal Constitucional almite a trámite los recursos d’Asturies y Andalucía contra’l decretu de recortes n’educación. L’Executivu asturianu nun ta d’alcuerdu con dos artículos del mesmu.
Les intenciones del ministru Soria d’aumentar los recortes al carbón nel 2013 lleva a Compromisu del Nalón a llamar a les instituciones y a la población a oponese a esta midida. Cree que va suponer el final definitivu de la minería asturiana.
El Gobiernu prepara un presupuestu pal 2013 d’ente 3.700 y 3.800 millones d’euros, lo que supón una mengua del 10 por cientu en comparanza col d’esti añu. Guillermo Martínez considera que sería “irresponsable” una prórroga nueva.
Un vecín d’Ayer acusáu de llanzar voladores a la Guardia Civil podría enfrentase a cuatro años de cárcel. Ésa ye la pena que pide la Fiscalía a una persona detenida’l 12 de xunu na A-66 a l’altura de Vega’l Rei (Ḷḷena) mentes la fuelga de la minería.
Les irregularidaes atopaes pola Coordinadora Ecoloxista d’Asturies na memoria presentada énte Medio Ambiente lleva a esti coleutivu a solicitar la paralización del parque eólicu de Carceda. Ésti ye ún de los 90 previstos nel occidente.
Téunicos d’E.ON y la Policía Xudicial continúen investigando les causes del accidente de Cabrales que provocó la muerte d’una muyer de 77 años. Al mesmu tiempu, siguen los trabayos de desescombriu na zona afeutada.
Del xueves al domingu, Zamora va enllenase de mazcaraes procedentes de dellos puntos de la Península Ibérica. Los Sidros y Les Comedies de Valdesoto van encargase de representar a Asturies nesta folixa de color y tradición.
Tres el conciertu nos actos oficiales del Día d’Asturies, en Tinéu, l’Asturiana Mining Company va continuar cola so ‘Xira del Meyor Cantar’ con una actuación en Xixón. Va ser el vienres, en Pumarín-Xixón Sur, a partir de les 20 hores.
