Compromisu por Asturies del Nalón refuga los recortes nuevos al sector mineru anunciaos por Soria

Les intenciones del ministru Soria d’aumentar los recortes al carbón nel 2013 lleva a Compromisu del Nalón a llamar a les instituciones y a la población a oponese a esta midida. Cree que va suponer el final definitivu de la minería asturiana.

José Manuel Soria, titular de la cartera d’Industria, Enerxía y Turismu, anunció que’l so Gobiernu nun sólo diba a mantener los recortes al carbón, sinón qu’éstos diben aumentar nel 2013. El retayu podría ser del 20 por cientu, según especulen dellos medios de comunicación, una cantidá que sumada al 64 por cientu d’esti añu llevaría a la minería asturiana al zarru, según afirmen dende Compromisu por Asturies del Nalón. “En namá dos años el Gobiernu del PP amenorgaría les ayudes a les esplotaciones mineres a los retayos a les subvenciones previstes pal añu 2018, nel que se debería de proceder al zarru de toles esplotaciones que nun fueren rentables según lo establecío nel Reglamentu de Subvenciones del Carbón”, apunten dende la federación de partíos.

“A la espera de que se presenten los Presupuestos Xenerales del Estáu pal añu 2013, podemos dicir de xuru, non yá que se van a volver retayar de mou salvaxe les ayudes al sector, sinón que tamién podemos dar por fechu otros tantos recortes nes polítiques de reindustrialización ya infraestructures” qu’agravará la situación, sobre manera nes zones mineres. Por esti motivu, dende Compromisu del Nalón llamen a les instituciones asturianes y a la población “a sofitar toles movilizaciones que se convoquen pa torgar lo que na práutica va suponer el fin de la minería asturiana”.