Hugo Chávez salió reelexíu presidente de Venezuela tres algamar el 54 por cientu de los votos nes eleiciones del país, que tuvieron una participación superior al 80 por cientu. El líder bolivarianu suma asina’l so cuartu mandatu.
La fuelga convocada pol Sindicato Médico Profesional de Asturias (SIMPA) tien un siguimientu del 7,87 por cientu, según datos aportaos pol SESPA. Les dos partes aconceyaron esti llunes, ensin llegar a alcuerdu nengún.
Iñigo Urkullu (PNV) ganaría les eleiciones n’Euskadi según la encuesta sobre intención de votu fecha pol CIS al sumar 27 escaños, cinco más que EH Bildu y 13 que’l PSE. Mentes, en Galicia, Alberto Núñez Feijoo (PP) rozaría la mayoría absoluta.
Tal día como esti vienres, 5 d’ochobre, d’hai 78 años dio aniciu una fuelga xeneral en casi tol Estáu. Asturies foi’l territoriu onde les reivindicaciones tuvieron un siguimientu más importante, entamándose una revolución nel nuesu país.
La Comisión de Lexicografía de la Real Academia Española (RAE) va estudiar l’informe presentáu por Iniciativa pol Asturianu en xunu nel rexistru de la entidá. El documentu ta avaláu por filólogos de diez universidaes de tol mundu.
Nel mes de xunu nacía la federación de partíos Compromisu por Asturies tres la celebración d’un conceyu fundacional n’Uviéu. La formación nueva, ensin logotipu, entama agora un concursu ente la so militancia pa escoyer un distintivu.
El presidente d’Asturies aconceyó col estatal esti xueves en La Moncloa. Javier Fernández treslladó a Mariano Rajoy los problemes del país, pero nun consiguió sacar compromisos concretos al líder conservador.
La CCXXV Comisión Permanente de la Conferencia Episcopal Española amosó la esmolición del obispáu pola “desintegración unillateral” d’España. Nuna declaración tamién llamaron al civismu ante los recortes del Gobiernu estatal.
Les persones que s’averen al centru comercial mierense Caudalia van poder visitar la esposición ’10 años normalizando’. Nella, la Rede de Normalización Llingüística nos Conceyos presenta los materiales usaos dende’l 2002.
El 24 d’ochobre va principiar un cursu d’asturianu, nivil d’aniciu, nel llocal del Centru Social Sestaferia, en Xixón. La Xunta pola Defensa de la Llingua Asturiana (XDLA) va encargase de la docencia al traviés de la profesora Iris Díaz Trancho.
