Los Sidros y Les Comedies van representar a Asturies nel Festival de la Máscara Ibérica de Zamora

Del xueves al domingu, Zamora va enllenase de mazcaraes procedentes de dellos puntos de la Península Ibérica. Los Sidros y Les Comedies de Valdesoto van encargase de representar a Asturies nesta folixa de color y tradición.

El platu fuerte del festival zamoranu, el segundu más importante del mundu tres el de Lisboa de mayu, va ser, como nun podía ser d’otra manera, el desfile de les mazcaraes previstu’l domingu a les 13 hores. Cerca de 300 persones de grupos procedentes de Portugal, Asturies, Lleón, Castilla y Galicia van dar color a les cais de Zamora y a sorprender a los sos habitantes y visitantes. La representación asturiana va correr a cargu d’unos veteranos nesti festival, Los Sidros y Les Comedies de Valdesoto, ún de los grupos favoritos del públicu.

Amás del desfile, Zamora va vivir cuatro díes de fiesta, música y diversión, con un cantidá grande d’actividaes per tola ciudá. Ún de los puntos de pasu obligáu ye la nomada ‘Muestra de les rexones’, onde va tar a disposición del públicu productos artesanos y gastronómicos de dellos puntos de la Península Ibérica. Nesta ocasión, Siero va instalar un stand nel que va promocionar el conceyu, asina como la so sidra. Amás, el sábadu a les 19 hores ta previsto una preba de xata asturiana. Otra manera, los responsables del chigre asturianu d’An Oriant/Lorient van tar presentes con una carpa de 25 metros cuadraos pa ufrir a zamoranos y visitantes sidra y productos del país.

No musical, la representación asturiana va correr a cargu de la Bandina del Principáu, de Llugones. Mentes, nos conciertos habituales del vienres y del sábadu van actuar João Tarrana  cola so guitarra portuguesa (21 hores) y los portugueses FlorEste (21 hores) y los llocales Santarén Folk (22 hores), de manera respeutiva. Hai que destacar que’l Festival de la Máscara Ibérica de Zamora ta entamáu pola asociación cultural portuguesa Progestur en collaboración col Patronato Provincial de Turismo y el Ayuntamiento de Zamora.