La XDLA denuncia que dellos institutos tán poniendo torgues al enseñu del asturianu

La Xunta pola Defensa de la Llingua Asturiana (XDLA) ta recibiendo quexes sobre dellos institutos que tán poniendo torgues al enseñu de Llingua Asturiana. Ún d’ellos ye’l xixonés Calderón de la Barca, asitiáu nel barriu d’El Coto.

La organización cívica tien constancia de que la direición d’esti centru ta tratando “que los alumnos/es de Bachilleratu queden ensin recibir les clases que quieren d'asturianu” pese a la sentencia de mayu del Tribunal Supremu eliminaba la ratio qu’establecía un mínimu d’ocho alumnos en Secundaria pa formar grupu de Llingua Asturiana. Tamién fai referencia a la Llei d’Usu y Promoción del Asturianu, incumplida dafechu pol PSOE, qu’establez que “l’asturianu tien que ser impartíu en tolos niveles y graos” y garantiza’l derechu del alumnu a dar clase de llingua.

“Exiximos al centru educativu y a la Conseyería d'Educación la solución inmediata d'esta situación, evitando facer dexación de funciones nesti periodu d'entamu de cursu. La so inaición nestos casos supón una vulneración de los derechos llingüísticos de la ciudadanía asturiana recoyíos na llexislación vixente”, aseguren dende la XDLA.