El Constitucional almite a trámite los recursos d’Asturies contra’l decretu de recortes n’educación

|

El BOE d’esti vienres espubliza que’l Plenu del Tribunal Constitucional almite a trámite los recursos d’Asturies y Andalucía contra’l decretu de recortes n’educación. L’Executivu asturianu nun ta d’alcuerdu con dos artículos del mesmu.

En concreto, el Conseyu de Gobiernu d’Asturies recurrió los artículos 3 y 4 del Real Decretu-llei 14/2012 de midíes urxentes de  racionalización del gastu públicu nel ámbitu educativu, aprobáu’l 20 d’abril pol Conseyu de Ministros, referíos al aumentu de les hores llectivas mínimes del profesoráu na enseñanza non universitaria y les sustituciones de docentes titulares por interinos a partir del décimu día de baxa de los primeros. La Xunta d’Andalucía tamién recurrió estos dos artículos, amás del 2, el 5, el 6 y el 7.

El primer d’ellos permite a les comunidades autónomes aumentar hasta un 20 por cientu el número máximu d’alumnos per aula, mentes que’l 5 aplaza la implantación de los módulos de Formación Profesional de 2.000 hores al cursu 2014-2015. Pela so parte, l’artículu 6 plantega cambios a la creación de centros universitarios, la implantación y supresión de les enseñances conducentes a la obtención de títulos, la cooperación ente universidaes y ente éstes y centros d’investigación, y modifica’l réxime de dedicación del profesoráu universitariu. Por último, el 7 establez que les autonomías financien colos sos presupuestos la diferencia ente’l preciu públicu que fixen y la llenda mínima que correspuenda a cada enseñanza.

 

Contador Estadistiques