Chávez gana les presidenciales de Venezuela col 54 por cientu de los votos y suma'l so cuartu mandatu

Hugo Chávez salió reelexíu presidente de Venezuela tres algamar el 54 por cientu de los votos nes eleiciones del país, que tuvieron una participación superior al 80 por cientu. El líder bolivarianu suma asina’l so cuartu mandatu.

El Gran Polo Patriótico, coalición qu’axunta los partíos y organizaciones qu’apoyen a Chávez, sumó’l 54,52 por cientu de los votos –col 90 por cientu del escrutiniu completu– pol 44,97 por cientu de la Mesa de la Unidad Democrática, liderada pol opositor Henrique Capriles. Ello permite a Chávez a mantenese nel poder per seis años más col apoyu de más de la metá de la población, anque si miramos los datos de los comicios del 2006, el líder socialista baxó dalgo más d’ochos puntos que ganó la oposición. Nesa ocasión, el so oponente foi Manuel Rosales, que se presentó por Unidad Nacional.

Chávez destacó que foi "una victoria en tola llinia" porque ganó "con más d’once puntos porcentuales de diferencia, con más d’ocho millones de votos bolivarianos". El presidente venezolano llevóse’l trunfu en 20 de los 24 estaos que conformen el país. “El candidato de la derecha acaba d’anunciar que reconoz la victoria bolivariana. Eso ye un pasu mui importante na construcción de la paz y de la convivencia en Venezuela", afirmó.