La RAE va estudiar la propuesta d’Iniciativa pol Asturianu de correxir la definición de ‘asturiano’

La Comisión de Lexicografía de la Real Academia Española (RAE) va estudiar l’informe presentáu por Iniciativa pol Asturianu en xunu nel rexistru de la entidá. El documentu ta avaláu por filólogos de diez universidaes de tol mundu.

Darío Villanueva, secretariu de la RAE, unvió un comunicáu al coleutivu que trabaya pola normalización de la llingua asturiana y agradeció la propuesta treslladada a la entidá responsable de la normativización de la llingua castellana pa la modificación del términu ‘asturiano’ nel so diccionariu. Según reza l’informe, ‘asturiano’ ye un axetivu y tien la definición siguiente na so tercer aceición: ‘Se dice de la variedad asturiana del dialecto romance asturleonés’. En términos paecíos atópase ‘bable’ –‘dialecto de los asturianos’–, ‘asturleonés, sa’ –na segunda aceición, ‘Se dice del dialecto romance nacido en Asturias y en el antiguo reino de León como resultado de la peculiar evolución experimentada allí por el latín– y ‘leonés’ –na sésta remite a ‘asturleonés’ y na sétima, ‘Se dice de la variedad del castellano hablada en territorio leonés’–. En ‘Definir el términu asturianu con xeitu/Definir el término asturiano con propiedad’, Iniciativa pol Asturianu presenta argumentos científicos y llegales pa la so igua nel diccionariu, dando a la llingua asturiana’l rangu de llingua, al igual qu’asocede con otros idiomes peninsulares.

Otra manera, la organización va aconceyar en feches próximes con Teresa Sanjurjo González, direutora de la Fundación Príncipe d'Asturies, pa tratar l’usu del asturianu na web de la entidá y nes sos actividaes. Tamién solicitó un conceyu cola direutora nueva del Centru Territorial de RTVE n’Asturies, Patricia Álvarez Ramos, pa proponer la inclusión del asturianu dientro de la cobertura informativa n’Asturies, asina como pa tratar cuestiones rellatives al usu de la toponimia oficial. “TVE ta acabante de presentar un informativu diariu d'ocho minutos, complementariu a ‘Panorama Regional’, nel qu'otra vuelta la llingua vehicular ye l'español. Creemos qu'ésti podría ser un bon espaciu pal emplegu del idioma asturianu con total normalidá y una amuesa al ente de comunicación públicu de la demanda qu'hai d'esti tipu de conteníos, ausentes de la cadena pública dende la esperiencia pilotu nel yá mentáu ‘Panorama Regional’”, apunten dende Iniciativa pol Asturianu.