La Rede de Normalización Llingüística nos Conceyos presenta la muestra ’10 años normalizando’

Les persones que s’averen al centru comercial mierense Caudalia van poder visitar la esposición ’10 años normalizando’. Nella, la Rede de Normalización Llingüística nos Conceyos presenta los materiales usaos dende’l 2002.

Cartelería, materiales didáuticos, folletos, xuegos y espublizaciones conformen esta muestra que va permanecer abierta’l públicu dende güei hasta’l 10 de payares. Asina, va poder vese material de campañes como ‘La salú colos cinco sentíos’, ‘El llibru del naciatu’, ‘Equí tas como en casa’ o ‘La sidra, d’Asturies’, ente otres munches.

La muestra ye una bona forma de conocer el trabayu desendolcáu dende los servicios de normalización llingüística a partir de l’apertura del primera oficina municipal de la llingua, en Llangréu, hasta l’actualidá, cuando funcionen un total de 14. La presentación de la esposición va tener llugar güei, a les 13 hores, y nella va intervenir l’alcalde de Ḷḷena, Ramón Argüelles, y el de Mieres, Ánibal Vázquez, asina como responsables de los servicios de normalización y representantes de dellos conceyos y de Caudalia.