El PNV llevaríase’l trunfu n’Euskadi y el Partido Popular en Galicia

Iñigo Urkullu (PNV) ganaría les eleiciones n’Euskadi según la encuesta sobre intención de votu fecha pol CIS al sumar 27 escaños, cinco más que EH Bildu y 13 que’l PSE.  Mentes, en Galicia, Alberto Núñez Feijoo (PP) rozaría la mayoría absoluta.

Los resultaos preeleutorales vascos daos a conocer pol Centro d’Investigaciones Sociolóxiques (CIS) predicen un cambiu de gobiernu n’Euskadi, agora en manos del Partido Socialista de Euskadi-Euskadiko Ezkerra (PSE-EE) gracies al apoyu del Partido Popular (PP). Urkullu ganaría les eleiciones al sumar 27 escaños (una estimación de votu del 36,2 por cientu) por 14 de los socialistes (17,2 por cientu) y 9 o 10 de los populares (10,7 por cientu), lo que nun permitiría otru alcuerdu de los partíos españolistes como asocedió nel 2009 cuando PSOE y PP sumaron 38 escaños (25 y 13, de manera respectiva) por 30 de los nacionalistes conservadores.

Hai que destacar que nesa cita coles urnes nun hubo presencia de la izquierda abertzale al tar illegalizada, a esceición d’Aralar, que sumó 4 escaños. Esta formación que refuga la violencia preséntase agora dientro de la coalición Euskal Herria Bildu –al igual qu’Eusko Alkartasuna (1 escañu nel 2009)–, que se situaría como la segunda fuercia más votada al algamar 21 o 22 escaños (25,1 por cientu de los votos). Tamién algamaría representación nel Parllamentu vascu Ezker Anitza, federación d’Izquierda Xunida nel país, con 3 escaños (4,2 por cientu de los votos), dos más que los que sumó Ezker Batua-Berdeak nes anteriores. La formación que se quedaría fuera sería Unión, Progreso y Democracia (UPyD) al perder el so escañu Gorka Maneiro por Araba (2,3 por cientu pol 3,98 por cientu del 2009). El total de votos sumaos nel conxuntu del país pol partíu de Rosa Díez supondría un 2 por cientu del total (un 2,15 por cientu hai cuatro años).

Por provincies hai que destacar la victoria d’EH Bildu n’Araba (7 escaños por 6 del PNV y del PSE-EE) y Gipuzkoa (10 o 9 frente a 9 del PNV y 4 del PSE-EE). Mentes, el PNV sería la fuercia más mayoritaria en Bizkaia con 12 escaños por 5 d’EH Bildu y del PSE-EE.

Núñez Feijoo saldría reelexíu en Galicia

El PP taría cerca de mantener la mayoría absoluta en Galicia al sumar el mesmu númberu d’escaños qu’hai cuatros años: 38. Sicasí, la estimación de votu de la encuesta del CIS sería del 44,1 por cientu, lo que supón una mengua de más de dos puntos (46,68 por cientu nel 2009). El PSdeG-PSOE tamién baxaría n’intención de votu al pasar del 31,02 por cientu al 28,2 por cientu, lo que llevaría a los socialistes a baxar de 25 escaños a 23 o 24.

El nacionalismu gallegu mantendría unos datos asemeyesaos pese a la escisión vivida nel BNG. La formación liderada por Francisco Jorquera acumularía 13 o 12 escaños (15,6 por cientu), cuando Anxo Quintana sumó 12 con un porcentaxe del 16,01 por cientu nel 2009. Mentes, Altenativa Galega de Esquerda, coalición formada por ANOVA-Irmandade Nacionalista –liderada por Xosé Manuel Beiras, impulsor de la corriente Encontro Irmandiño dientro del BNG– y Esqueda Unida –federación gallega d’IX– xunto Equo Galicia y Espazo Ecosocialista Galego, entraría na Xunta de Galicia con un representante (4,6 por cientu). Ésti vendría gracies a los resultaos d’A Coruña (6,2 por cientu).