Avérense les eleiciones de mayu y Andecha Astur preséntase como la única candidatura nacionalista. La organización fai “un llamamientu d’urxencia al conxuntu del nacionalismu asturianu pa qu’asuma les sos responsabilidaes y xunza esfuercios con Andecha Astur”.

L’uviedín Francisco García Pérez resultó gallardonáu col VI Premiu Timón p’autores asturianos en castellanu que convoca l’Asociación Cultural L’Arribada. Enantes diose a conocer el IX Premiu Timón pa escritores en llingua asturiana y eonaviego, que foi pa la cabraliega Esther Prieto.

‘Lo escrito nel silenciu’ ye la obra última del escritor Xurde Álvarez, un poemariu que tien versión tamién en castellanu y que naz con un espíritu solidariu. Tolos ingresos que reciba nun añu pola so venta van dir pa la Fundación Banco de Alimentos de Asturias.

Nueve conferencies, quince charres escolares y nueve esposiciones conformen ‘El Parque Histórico Fala 2015’, ciclu d’actividaes que van desendolcase a lo llargo del añu nos nueve conceyos de la rexón. La primera va tener llugar esti vienres en Llóngara cola participación d’Aurora Bermúdez.

L’Asociación Mezá entama un cursu básicu de gallego-asturiano n’Uviéu, que va principiar el xueves. Va tener un llargor de 16 hores y el plazu de matrícula va continuar abiertu depués del aniciu de les clases.

Yá ta abiertu’l plazu pa unviar rellatos pal XVIII Concursu de Cuentos pola Oficialidá del Asturianu qu’entama l’Ayuntamientu de Bimenes. Éstos han de remitise a la Casa Conceyu enantes del 9 mayu.

Ciudadanos de Grandas y de conceyos cercanos enllenaron la Casa de Cultura nel actu de presentación de ‘El Batallón Galicia’, la primer novela de Cristóbal Ruitiña. Xosé Miguel Suárez Fernández ‘Tapia’ emponderó’l trabayu del periodista y la so habilidá pa entemecer realidá y ficción.

La importancia de les eleiciones de mayu lleva a la Xunta pola Defensa de la Llingua Asturiana (XDLA) a adelantar la fecha del XXVII Conciertu pola Oficialidá, que va celebrase’l 2 de mayu. Les otres novedaes d’esta edición son el pasu de les actuaciones a una sala, en concretu la xixonesa Acalpulco, y la grabación de los conciertos pa la edición d’un CD.

SUATEA, Fete-UXT, Fe-CC OO y CSI roblaron un comunicáu conxuntu nel que refugaron el currículu propuestu pola conseyería pa Secundaria y Bachilleratu, y recordaron la falta de compromisu d’Ana González al nun crear la especialidá docente de Llingua Asturiana. Los sindicatos ven na oficialidá la solución a tolos problemes qu’atopa l’idioma nel ámbitu educativu.

‘Manuscrito poetas asturianos (…) siglo XVIII’ ye’l nome de la coleición de testos “de gran importancia lliteraria y llingüística” qu’alquirió recién el Gobiernu d’Asturies nuna puya en Madrid. El so costu foi de 8.500 euros y el destín, la Biblioteca d’Asturies ‘Ramón Pérez de Ayala’.