Xurde Álvarez asoleya un poemariu col compromisu de donar los beneficios a la Fundación Banco de Alimentos

‘Lo escrito nel silenciu’ ye la obra última del escritor Xurde Álvarez, un poemariu que tien versión tamién en castellanu y que naz con un espíritu solidariu. Tolos ingresos que reciba nun añu pola so venta van dir pa la Fundación Banco de Alimentos de Asturias.

El llangreanu apostó nesta ocasión pola espublización d’esti trabayu de manera independiente, tanto en formatu papel como en dixital. Pa la so distribución apostó pola plataforma de comerciu pela rede Amazon, qu’ufre ‘Lo escrito nel silenciu’ por 9,38 euros y 3,60, de manera respeutiva. “A ver si-yos podemos echar una aida, más que nos alimentos y nes perres que se recueyan, que sedrán poques –yá saben lo que da un llibru–, en que se conoza el so llabor tamién nel mundu de los que facemos dalgo pola llingua y qu'a so vez la nuesa llingua se vea solidaria pa colos que más necesidaes tienen”, espresa Álvarez, qu’anima a tolos asturianos a facer donaciones d’alimentos al Banco de Alimentos, organización ensin ánimu d’arriquecimientu que reparte éstos ente la xente con menos recursos.

El poemariu d’Álvarez “cuenta una hestoria d'amor dende'l so aniciu hasta la so resolución final”, según esplica l’autor, que tardó diez años en dar forma a esti llibru. Enantes, el llangreanu espublizara nesti xéneru ‘La sema’, ‘Tierra d’esperanza’ y ‘La caída’, les trés con Ediciones Trabe. Tamién tien escrito narrativa y teatru, y ye responsable de delles antoloxíes. No que respeuta a ‘Lo escrito nel silenciu’, Álvarez tien colgaos cuatro poemes na so cuenta de YouTube como avance pa los llectores.