Andecha Astur llama al nacionalismu asturianu a comprometese coles sos candidatures

Avérense les eleiciones de mayu y Andecha Astur preséntase como la única candidatura nacionalista. La organización fai “un llamamientu d’urxencia al conxuntu del nacionalismu asturianu pa qu’asuma les sos responsabilidaes y xunza esfuercios con Andecha Astur”.

Nun comunicáu asoleyáu al traviés de la so páxina web, la formación nacionalista d’izquierdes amuésase mui crítica con Podemos, a la que ven como un “reencadarmamientu de la izquierda española” alrodiu d’una “franquicia mediática” que consiguió arrastrar nel país “a seutores autonomistes/rexonalistes que se reivindicaben dientru’l nacionalismu, que siempres se negaron a participar en procesos de xunidá, y qu’agora enártense dientru la estructura centralista d’esa formación, pretendiendo  que la sucursal n’Asturies de Podemos seya un referente pal nacionalismu asturianu”. Les declaraciones continues de los sos responsables nes que refuguen asumir la oficialidá “como mecanismu necesariu pa la normalización llingüística y democrática n’Asturies” ye una de les razones que fai a la organización cargar contra Podemos. “Resulta inxustificable dafechu y pon n’evidencia el so fuerte componente españolista y la so falta respetu a los derechos democráticos y a los derechos nacionales asturianos”, aseguren dende Andecha Astur.

Otra crítica que faen dende la organización al partíu lideráu n’Asturies por Daniel Ripa y que va tener como candidatu en mayu a la presidencia del país a Emilió León ye la so “estudiada ambiguedá”, que respuende “a ún de los principios básicos del neolliberalismu, que ye afirmar la inesistencia de polítiques d’izquierdes y de dereches”. “Andecha Astur nun dubia en posicionase claramente col pueblu. Los nuesos entamos idiolóxicos y el nuesu programa asítiamos nidiamente na izquierda, porque una sociedá xusta ya igualitaria namás pue defendese dende la izquierda”, afirmen. Por último, faen referencia a la propuesta de Podemos “de reforma del Estatutu d’Autonomía del ‘Principado’, en cuentes d’apostar pol Drechu a Decidir”, lo que pa los asturianistes “costitúi toa una declaración de sucursalismu españolista”.

“Ello asina, Andecha Astur reivindícase comu la organización xunitaria y referencial del nacionalismu asturianu, y fai un llamamientu d’urxencia al conxuntu del nacionalismu asturianu pa qu’asuma les sos responsabilidaes y xunza esfuercios con Andecha Astur, no que consideramos un puntu d’inflexón del panorama políticu que requirirá una necesaria ampliación de les bases sociales ya idiolóxiques del mesmu”, entienden dende la organización, que pon como mou de contautu la direición de corréu electrónicu infoandecha@gmail.com.