El Conceyu de Xixón convocó’l VIII Premiu d’Ensayu y Trabayos d’Investigación Fierro Botas, concursu que l'edil Carlos Rubiera espera que sía “otra vez un ésitu de participación y de resultáu pola calidá de los trabayos”. El ganador de la sétima edición foi Martín Pérez Álvarez con ‘Curandeiros, compostores y outros sanadores’.

Iniciativa pol Asturianu celebró’l sábadu en Xixón el segundu Congresu, nel que repasó l’actividá desendolcada nos 3 años de vida de la organización y nel que los socios escoyeron xunta direutiva. Inaciu Galán va repetir como presidente y amplia’l númberu de vocalíes p’aumentar l’actividá reivindicativa.

Emilio Léon afirmó que Podemos refuga'l cambiu de cromos propuestu pol PSOE pol que los socialistes quedaríense con Xixón y Ana Taboada sería l’alcaldesa d’Uviéu. La formación va llevar a consulta ciudadana’l so posicionamientu énte la investidura a la presidencia d’Asturies. Mentes, en Llangréu l’asamblea de Somos Llangréu decide abrir negociaciones con IX.

La situación dantesca que se vivió’l domingu eleutoral, cola retirada de papeletes a Andecha Astur por tar n’asturianu, lleva a la Xunta pola Defensa de la Llingua Asturiana (XDLA) a demandar a los partíos con representación na Xunta Xeneral que pongan fin a “estes actitúes propies d'un periodu predemocráticu”. Recuerda que ye un incumplimientu de la llexislación vixente, tanto nacional como estatal y europea.

El Conceyu de Bimenes convoca un añu más, y yá van dieciséis, el so concursu de gaita destináu a intérpretes mozos menores de 21 años. La final ta prevista pal 5 de xunetu, cola posibilidá de celebrar una semifinal el 28 de xunu, y el plazu d’inscripción fina’l 19 de xunu.

L’Academia de la Llingua Asturiana (ALLA) abrió’l plazu de matriculación pa la Universidá Asturiana de Branu (UABRA), que va celebrase en Cangas del Narcea del 3 al 14 d’agostu baxo la direición de María Cristina Valdés. Les persones interesaes tienen hasta’l 5 de xunu pa formalizar la so inscripción.

Andecha Astur fixo una valoración de los sos resultaos eleutorales al traviés del so candidatu, Paulo Arboleya. La formación nacionalista cree que marquen “un puntu d’inflexón qu’obliga a redefinir tol asturianismu políticu”.

El 25 de mayu del 1808, la Xunta Xeneral proclamóse soberana rebelándose contra les tropes franceses de Napoleón qu’invadieren el país. La coincidencia d’esta fecha tan significativa pa la nuesa historia cola resaca eleutoral condénala a un escaezu entovía mayor que n’años anteriores por parte de les instituciones.

Los resultaos en dellos conceyos foron positivos pa organizaciones de calter asturianista marcáu. El PAS sumó 3 conceyales en Bimenes con un 23,43 por cientu de los votos, dos representantes más que nel 2011, y Conceyu Abiertu por Noreña suma un segundu edil tres rexistrar un 14,63 por cientu.

Javier Fernández resultó vencedor de les eleiciones n'Asturies pese a sufrir un baxón importante de votos. La FSA-PSOE, col 98,43 por cientu escrutáu, algama 14 diputaos, 3 menos que nel 2012, al sumar un 26,37 por cientu del total de votos (32,10 por cientu nes anteriores). El PP aumenta a 11 escaños y Podemos entra con 9 nun Parllamentu con seis partíos representaos.