Los sindicatos educativos refuguen el currículu propuestu por Educación y ven na oficialidá la solución a toles problemátiques qu'atopa l'idioma

SUATEA, Fete-UXT, Fe-CC OO y CSI roblaron un comunicáu conxuntu nel que refugaron el currículu propuestu pola conseyería pa Secundaria y Bachilleratu, y recordaron la falta de compromisu d’Ana González al nun crear la especialidá docente de Llingua Asturiana. Los sindicatos ven na oficialidá la solución a tolos problemes qu’atopa l’idioma nel ámbitu educativu.

“L'alministración pon sobre la mesa una propuesta de currículu que supón una agresión directa a la presencia de la Llingua asturiana y del Gallego-asturiano na educación Secundaria y el Bachilleratu. Ye una propuesta qu'incumple la Llei d'Usu y marxina l'asignatura como nunca se fixera hasta agora”, afirmen nel comunicáu. La propuesta presentada pola conseyería dexa en Secundaria al idioma como optativu en competencia “con gran númberu de materies” y con un pilancu nuevu: la obligatoriedá de cursar l’asignatura con anterioridá pa poder dar Llingua Asturiana o Gallego-asturianon nes etapes cimeres. Mentes, en Bachilleratu súmase un recorte del 75 por cientu de los hores llectives, pasando de 4 a la selmana a 1.

“Ye indefendible la posibilidá d'impartir con un mínimu calidá esta enseñanza y menos entá cumplir col currículu que pa ella foi asignáu nesti mesmu decretu. Una hora selmanal ye una burlla tantu pa los profesionales que tendrán d'impartila como pal alumnáu qu'opte al so aprendizaxe”, aseguren los sindicatos educativos, qu’entienden que, na práutica, esti apueste de l'alministración educativa supón condergar, al curtiu plazu, el futuru del asturianu nes etapes cimeres, y tener nel futuru una incidencia negativa na escolarización nel restu d'etapes educatives”. En too casu, “manifiesta la nula intención de contribuyir al fomentu de la recuperación, desenvolvimientu y promoción del usu de la nuesa llingua, elementos que, xuntu col establecimientu de los medios qu'amparen el derechu de los cuidadanos a conocelo y usalo, constitúin l'oxetivu que marca la Llei d'Usu y Promoción”.

La oficialidá como solución y la falta de compromisu de González

Nel testu robláu de manera conxunta tamién hai mención al incumplimientu del compromisu anunciáu por González a los pocos meses de garrar la conseyería de crear la especialidá docente nesta llexislatura. “Na última resolución de la Xunta de Personal Docente non Universitariu, aprobada por unanimidá, esixíase la tramitación pela vía d'urxencia de la creación d'esta especialidá, cuestión especialmente importante nun contestu d'inminente aprobación d'un nuevu decretu estatal d'Especialidaes y de la inmediata aplicación del nuevu currículu LOMCE na enseñanza Secundaria y Bachilleratu. Lloñe d'esto, la situación na que nos atopamos ye d'incertidume absoluta sobre la posibilidá d'avanzar na regularización de l'asignatura. Tres la respuesta del ministeriu y la falta d'iniciatives concretes per parte de la conseyería asturiana, el profesoráu va siguir avocáu a la so situación d'inestabilidá, lo que repercute negativamente na calidá de la enseñanza”.

Tres repasar estes dos problemátiques últimes qu’atopó l’idioma na educación, SUATEA, Fete-UXT, Fe-CC OO y CSI entienden que “declarar oficial a la lingua asturiana ye, nestos momentos, la midida que podría solucionar el so estatus nel ámbitu educativu y la única apuesta rial que impedirá la degradación total hasta la so desapaición”. El sábadu pasáu, la conseyera convocó una rueda de prensa pa facer balance de la llexislatura no que se refier a Educación, ensin referíse en momentu nengún a la materia de Llingua Asturiana pese a les critiques constantes que recibió nestes dos selmanes últimes pola so postura col idioma dende  l’Academia de la Llingua Asturiana, los sindicatos, organizaciones cíviques, formaciones polítiques como Equo y Izquierda Xunida, o’l círculu de Derechos Llingüísticos de Podemos. Na so intervención, la conseyera centróse nel refuerzu a les polítiques sociales fechu pol so departamentu cola xuba d’un 50 por cientu nes ayudes a la merca de llibros de testu, l’aumentu de la ufierta na Formación Profesional y la conxelación de les tases universitaries.