Bimenes convoca una edición nueva del Concursu de Cuentos pola Oficialidá del Asturianu

Yá ta abiertu’l plazu pa unviar rellatos pal XVIII Concursu de Cuentos pola Oficialidá del Asturianu qu’entama l’Ayuntamientu de Bimenes. Éstos han de remitise a la Casa Conceyu enantes del 9 mayu.

El conceyu yerbatu caltién esti concursu pese a que per tercer añu consecutivu nun va contar col sofitu de la Conseyería d’Educación, Cultura y Deporte nin de la Obra Social y Cultural de Caxastur. Según establecen les bases de participación, tolos rellatos que se presenten al premiu –ún por persona– han de ser inéditos y deben tar redactaos en llingua asturiana, respetando les normes ortográfiques vixentes. Éstos nun deben esceder les diez fueyes, mecanografiaes a doble espaciu per una cara, según marquen les bases del concursu. Los participantes han de presentar un orixinal del cuentu, trés copies del mesmu y otra más en CD baxo un nomatu que debe apaecer nuna plica con tolos datos personales y un currículu con semeya.

Un xuráu formáu por trés persones cualificaes y presidíu pol alcalde de Bimenes, Alejandro Canteli, va decidir el ganador del concursu, que va llevar 600 euros. El segundu y el tercer clasificáu tamién van llograr una recompensa de 450 y 300 euros, de manera respeutiva. Na edición del añu pasáu, el ganador d’esti concursu foi Pablo Rodríguez Alonso cola obra ‘L’invitáu’. Mentes, el segundu premiu llevólu Elisabet Felgueroso, con ‘El foriatu’, y el terceru, Paco Álvarez con ‘Una nueche en La Belle Alliance’.

Los interesaos en participar nel XVIII Concursu de Cuentos pola Oficialidá de Bimenes han d’unviar la so creación enantes del 9 de mayu nun sobre al Conceyu de Bimenes –faciendo referencia al concursu– na direición Martimporra, s/n, códigu postal 33527 (Bimenes). L’apertura de pliques va tener llugar el 9 de xunu nun actu abiertu al públicu. En casu de duldes sobre’l funcionamientu del certame, la organización pon a disposición de los concursantes un teléfonu: el 985.700.004.