Alicia Álvarez y David Varela van poner un conciertu n’acústicu con una esbilla de los cantares de ‘Bestiariu’, proyeutu qu’axunta a decenes de grupos asturianos con cantares con animales como filu conductor. Esta actividá va abir el primer semestre del ciclu La Reciella de La Factoría qu’aporta a Avilés teatru, música y cuentos.

El Grupu Epona edita la segunda edición del llibru ‘Mitoloxía pa rapacinos y rapacines’ baxo’l nome de ‘Mitoloxía pa la reciella’, más inclusiva que l’anterior. Espublizáu nel 2007, esta asociación cultural torna a asoleyar esta obra tres la bona acoyida que tuvo hai 12 años.

El VI Festival Escenines pa la Reciella programa cuatro actividaes pa esta Navidá. Dende’l miércoles hasta’l sábadu, el xixonés Centru de Cultura Antiguu Institutu va acoyer teatru, títeres, conciertos y cuentacuentos en llingua asturiana.

Ente’l 25 d’avientu y el 6 de xineru celébrase la Navidá, un tiempu que de xuru te presta porque, amás de les vacaciones escolares y los regalos que se reciben nestes feches, ye un momentu de reunión familiar. Pero, ¿qué se celebra en Navidá? Los católicos y otros cristianos festexen la fecha de nacencia de Xesús, anque nun hai certeza de que fora nesa fecha.